‘चिपगु नीलः’ पिदन (भिडियोलिसें)

eBukhan – बिराज,    २०८१ जेठ २७, आइतबार    वर्गीकृत मनोरञ्जन

बाखं च्वमि केशरमान ताम्राकारया अवार्ड विनर बाखनय् आधारित सर्ट फिल्म ‘चिपगु नीलः’ पिदंगु दु ।

थनिं ४० दँ न्ह्यः ताम्राकारं नेपालभाषा साहित्य सम्मेलनय् न्हापा सिरपाः त्याकादीगु बाखंया लिधंसाय् दयेकूगु चिहाः संकिपा ‘चिपगु नीलः’ शनिबाः किपूस्थित कीर्तिपुर सिनेप्लिक्सय् प्रिमियर यासें सार्वजनिक याःगु खः ।

शनिबाः जनकवि दुर्गालाल श्रेष्ठया उपस्थितीइ जूगु ज्याझ्वलय् उगु चिहाः संकिपा प्रिमियर याःगु खः । ज्याझ्वलय् साहित्यकार हितकरवीर सिंह कसाः व आख्यानकार मथुरा सायमिलिसेंया नं उपस्थिती दुगु खः ।

उगु हे ज्याझ्वलय् जनकवि श्रेष्ठ, साहित्यकार कसाः व आख्यानकार सायमिं संकिपाया कलाकार, प्राविधिक लिसें संकिपा दयेकेत ग्वहालि याःपिन्त खादां न्ययेकाः दसिपौ लःल्हानादीगु खः ।

नेवाः ख्यलय् निरन्तर रुपं सर्ट फिल्मलिसें म्यूजिक भिडियो निर्देशन यानावःम्ह योवन शाक्यं संकिपाया निर्देशन यानादीगु दु ।

शाक्यं थ्व स्वयां न्ह्यः ‘शहिद’, ‘आजु द्यः बाघ भैरब’, ‘ध्वः छध्वः रेखाया’ थुज्वःगु शर्ट मुभि दयेकाः अवार्ड तकं त्याकादीधुंकूगु दु ।

छायाङ्कन व दृश्य सम्पादन रक्की महर्जन व योवन शाक्यं याःगु दु ।

संकिपाय् नेरिसा महर्जन, मनोज महर्जन, सुनिता श्रेष्ठ, चिरिबाबु महर्जन, नविन थेच्वमि, गंगा महर्जन, सलिना महर्जन, हसना महर्जन व मचा कलाकार कथं ओसमि रंजितकारं अभिनय यानादीगु दु ।

संकिपाया टाइटल म्ये थौंकन्हय् लोकंह्वानाच्वंम्ह म्येहालामि निभा डंगोलं हालातःगु दु ।

थुगु शर्ट फिल्मया सम्बाद लेखन उमेश स्थापितं यानादीगु खःसा, संगीत यचु शाक्ययागु खः ।

भाःत मदुम्ह छम्ह मिसां हाकनं थःगु जीवनयात न्हूगु कथं न्ह्याकेत याःगु संघर्षयात संकिपाय् न्ह्यब्वयातःगु दु ।

प्रिमियर जूगु लिसें थुगु चिहाः संकिपा नेवाः इन्टरटेनमेन्ट एचडी युट्युब च्यानलपाखें विश्वव्यापी सार्वजनिक नं जुइधुंकूगु दु ।