बाल यौन दुर्व्यवहार सम्वन्धि सन्देशमुलक चिप्याखं ‘भावना’या प्रिमियर क्वचाःगु दु ।

संसार क्रिएसन्सया ब्यानरय् दयेकूगु चिप्याखं ‘भावना’ या प्रिमियर छगू ज्याझ्वःया दथुइ याःगु खः ।

चिप्याखं प्रिमियर धुंकाः ज्याझ्वलय् न्ववासें संसार क्रिएसन्सया क्रिएटिभ डाइरेक्टर लिसें नेवाः संकिपा ख्यलय् नांजाःम्ह कलाकर्मी स्वतन्त्र संसार महर्जनं संकिपामार्फत ब्वनेकुथिइ ब्वनाच्वंपिं मिसा मस्तयत जुइगु थीथी कथंया यौन दुर्व्यवहारयात क्यनाः सामाजिक सचेतना थनेत स्वयागु धयादिल ।

ज्याझ्वलय् मेरो बोलि डटकमया ज्ञान भक्त डंगोल, वरिष्ठ सिने पत्रकार विजयरत्न असंबरे, अभिभावकयापाखें शोभा पहेली, समाजसेवी प्रल्हाद रानाभाटलिसें नं मिसामस्तय् प्रति जुइगु यौन दुर्व्यवहार, घरेलु हिंसायात कयाः थःथःगु बिचाः तयादीगु खः ।

थुगु चिप्याखंया बाखं एन्थोनि शाक्यं च्वयादीगु दु । स्वतन्त्र संसार महर्जनया निर्देशन सल्लाहय् धीरज थापा मगरं निर्देशन यानादीगु दु । दृश्य सम्पादन व छायाङ्कन दिप शेर्पालिं यानादीगु दु ।

बिमला बमजनलिसें सोनिया तामाङ्ग, राकेश खडगी, दिलिप शेर्पालि, आदित्य जैसवाल, कल्पना धुलिखेलि, अनिता रोका मगर, क्रिशु पहेली, सुप्रिया शाक्य, सुजि मालि, गुन्जन शाक्य, स्वीकृति बानिया अले कक्षा ६ व ८ का विद्यार्थीतयसं प्याखनय् अभिनय यानादीगु दु ।

प्रिमियर धुनाकथं थुगु चिप्याखं सन्सार्स अनलाइट टिभि युट्युब च्यानलमार्फत विश्वव्यापी सार्वजनिक जुइधुंकूगु दु ।