सांगितिक ख्यःया थपु यायेत संसार संगीतालय पलिस्था
eBukhan – बिजयरत्न, २०८१ श्रावण १८, शुक्रबार वर्गीकृत मनोरञ्जन
नेवाः संगीतख्यःया संरक्षण व सम्बर्द्धनय् तिबः बीगु धासें यलया ख्वनाय् संसार संगीतालय पलिस्था जूगु दु ।
संकिपा व संगीत ख्यलय् मदिक्क पलाः न्ह्याकावःम्ह कलाकःमिलिसें संसार्स क्रिएसन्सया क्रिएटिभ डाइरेक्टर स्वतन्त्र संसार महर्जनया कुतलय् संसार संगीतालयया बिहिबाः विधिवत शुभारम्भ जूगु खः ।
ज्याझ्वलय् यल महानगरपालिका वडा २१ या वडाध्यक्ष रविन्द्र महर्जनं संसार संगीतालयया शुभारम्भ यानादिल ।
ज्याझ्वलय् म्येहालामि संगीतसेवी व समाजसेवी सरिता महर्जनं थीथी बाजं व संगीत सम्बन्धि हलंज्वलं संसार संगीतालययात लःल्हानादीगु खः ।
संसार्स क्रिएसन्सया क्रिएटिभ डाइरेक्टर महर्जनं नेपालभाषाया सांगितिक ख्यःयात तब्या यानायंकेत तिबः जुइकथं थीथी ज्याझ्वः यानावनेगु आज्जु संगीतालयं काःगु धयादिल ।
थ्वहे झ्वलय् छुं ई लिपा संगीत प्रशिक्षणया ज्याझ्वः न न्ह्याकेगु ग्वसाः दुगु महर्जनं कनादिल ।
ज्याझ्वलय् क्रिएटिभ डाइरेक्टर महर्जन व म्येहालामि सरिता महर्जनया नापनापं वरिष्ठ म्येहालामि जुजुकाजि रन्जित, लोकंह्वाःपिं गायक प्रवेशमान शाक्य व किशोर शाहि लगायतं म्ये हालादीगु खः ।
ज्याझ्वलय् नांजाःम्ह संगीत गुरु रत्न बेहोशी, संगीतकार अनिल तुलाधर, साहित्यकार विक्रमभक्त जोशी व नेपालभाषाया न्हापांम्ह सिने पत्रकार विजयरत्न असंबरे लगायतया उपस्थिती दुगु खः ।
