हलिंया दकले तःधंगु व ईया ल्याखं ताःहाकःतक न्ह्याइगु दाबी यानातःगु स्टार नेपालभाषा म्यूजिक भिडियो अवार्डया स्वक्वःगु संस्करणया लागिं म्ये दर्ता चाःगु दु ।

संसार क्रिएसन्सं बुधबाः यलया ख्वनाय् ग्वसाः ग्वःगु छगू ज्याझ्वलय् अवार्डया स्वक्वःगु संस्करणया लागिं म्ये दर्ता खुल्ला जूगु घोषणा याःगु खः ।

ज्याझ्वलय् संसार क्रिएसन्सया क्रिएटिभ डाइरेक्टर स्वतन्त्र संसार महर्जनं स्वंगूगु संस्करणतक थ्यंबलय् अवार्डयात व्यापकता बियाः थुकियात राष्ट्रिय स्तरय् यंकेगु कुतः यानागु धयादिल ।

‘थ्व अवार्डयात हलिमय् तःधंगु व अप्वः ईतक जुइगु ताःहाकःगु अवार्डया रुपं गिनिज बुकय् दर्ता यायेत स्वयाच्वनागु दु । स्वंगूगु संस्करण थ्यंबलय् राष्ट्रिय स्तरय् यंकाः थुकिया नां संसार राष्ट्रिय म्यूजिक भिडियो अवार्ड्स दयेकागु दु’ क्रिएटिभ डाइरेक्टर महर्जनं धयादिल ।

सकल म्येहालामि, कलाकार, सर्जकं वइगु मंसीर मसान्त दुने थःथःगु म्ये, म्यूजिक भिडियो अवार्डया लागिं दर्ता यायेत महर्जनं आह्वान यानादिल ।

संसार क्रिएसन्सं नेपाःमिया निगूगु तःधंगु नखः स्वन्ति व न्हूदँ नेपाल सम्वत ११४५ या लसताय् भिंतुना कालबिल ज्याझ्वःया ग्वसाः ग्वःगु दु ।

ज्याझ्वलय् संसार क्रिएसन्सया संस्थापक प्रेमा संसार महर्जनं संस्थाया म्हसीका बीगुलिसें संस्थां यानावःगु ज्याझ्वः, ज्याखँया बारे जानकारी बियादिल ।

यल महानगरपालिका वडा २१ या वडाध्यक्ष रविन्द्र महर्जन, वरिष्ठ संगीतकार रत्न बेहोशी बज्राचार्य, वरिष्ठ निर्देशक लिसें रचनाकार पवन जोशी, वरिष्ठ सिने पत्रकार विजयरत्न असंबरे, वरिष्ठ संगीतकार राजु सिंह लिसेंनं थःथःगु बिचाः तयादीगु खः ।

लिसें गायिका, संसार संगीतालयया संरक्षक सरिता महर्जन, प्रकृती प्रेमी समूहया संरक्षक लक्ष्मीनारायण सिं सुवाल व वरिष्ठ साहित्यकार विक्रम भक्त जोशीं स्वन्ति व न्हूदँ नेपाल सम्वत ११४५ या भिंतुनालिसें थःथःगु नुगःखँ तयादीगु खः ।

व हे ज्याझ्वलय् संसार अनलाइन टिभी युट्युब च्यानलय् अपलोड जूगु म्येया सर्जकयात भ्यूजया लिधंसाय् रोयल्टी नं लःल्हाःगु खः ।

अथेहे, युट्युब च्यानलया टप ५ भ्यूज म्येयात लसहना पौलिसें हंगु नं खः ।

ज्याझ्वलय् एज्लिना राईं हुलाप्याखं व सरीता महर्जन, स्वतन्त्र महर्जन, सरस्वती मानन्धर, राजेन्द्र श्रेष्ठ, सविना मानन्धर, राजेन्द्र शाक्य, एलन शाही, समा डंगोल, राजु नकर्मी, बीणा महर्जन, चेकराम अवाले व प्यारी सुवाललिसेंया म्येहालामिपिन्सं म्ये न्ह्यब्वयादीगु खः ।