यलय् आः न्ह्यानाच्वंगु बुंगद्यःया रथयात्रा आः मेगु गुगु दिनय् जुइ धइगु अनिश्चित जूगु दु ।

नेपाःया हे दकले ताःहाकःगु जात्राया रुपं काइगु बुंगद्यःया रथयात्रा रथया मर्मत सम्भारया लागिं धासें छुं दिंया लागिं स्थगित जूबलय् मेगु रथयात्राया दिं अनिश्चित जूवंगु खः ।

गुठी संस्थान, शाखा ज्याकू यलं छगू सुचं जारी यासें मेगु सुचं मवःतल्लेयात रथयात्रा स्थगित जूगु धाःगु खः ।

थुगुसी रथयात्राया न्हापांगु दिनय् हे रथय् क्षति जुयाः छ्वयला प्वाःगनीगु खःला धइगु खँ तकं पिहांवःगु खः । तर लिबाक्क हे जूसां गाःबहाःयाः न्यायेकूगु खः ।

न्हापांगु दिनंनिसें हे रथ तसकं धेय चूबलय् रथ निर्माणया विषययात कयाः तसकं आलोचना नं जुयावःगु खः ।

थ्व हे झ्वलय् म्हिगः बिहिबाः रथयात ओकुबहालं सालायंकाच्वंबलय् रथया पाङ्ग्रा लिक्कया भाग त्वधूबलय् रथयात्रा अवरुद्ध जूवंगु खः ।

बुधबाः नुगः त्वालं सालायंकाः ओकुबहालय् दिकातःगु रथ म्हिगः ओकुबहालं सालायंकाः भचा जक क्वय् थ्यंबलय् रथया पाङ्ग्रा लिक्कया भाग त्वधूबलय् रथ थपाहितिइ हे दिकेमाःगु खः ।

रथ सालाच्वंबलय् रथया पाङ्ग्राया लिक्कया भाग त्वधूबलय् रथयात्रा अवरुद्ध जूवंगु खः ।

आः रथय् माःकथंया मर्मत सम्भार यानाः जक मेगु रथयात्राया दिंया सुचं पिथनेगु व रथयात्रा निरन्तर यायेगु गुठी संस्थान यल शाखां धाःगु दु ।