बुंगद्यःया रथयात्रा थौं शनिबाःनिसें न्ह्याइगु

eBukhan – बिराज,    २०८१ जेठ ५, शनिबार    वर्गीकृत तजिलजि

रथ स्यनेधुंकाः दिनाच्वंगु बुंगद्यःया रथयात्रा थौं शनिबाःनिसें न्ह्याइगु जूगु दु ।

रथया आवश्यक मर्मत सम्भारया ज्या क्वचाःगुलिसें रथयात्रा थौंनिसें निरन्तर जुइत्यंगु खः ।

शुक्रबाः गुठी संस्थान कचा ज्याकू यलं सुचं जारी यासें बुंगद्यःया रथयात्रा थौं जेठ ५ गते शनिबाःनिसें निरन्तर जुइगु धाःगु खः ।

थ्वयां न्ह्यः बिहिबाः गुठी संस्थान यलं रथया मर्मत यायेमाःगु जूगुलिं मेगु सुचं मवःतल्लेयात रथयात्रा स्थगित धइगु सुचं पिथंगु खः ।

आः बुंगद्यःया थपाहितिइ तयातःगु दु । बिहिबाः रथयात्राया झ्वलय् ओकुबहालं सालाः थपाहिति थ्यंबलय् रथया पाङ्ग्रा लिक्कया ब्व त्वधुलेधुंकाः रथ सालेगु स्थिती मदयाः रथयात्रा द्यूवंगु खः ।

म्हिगः शुक्रबाः क्रेन तकं हयाः रथयात माःगु मर्मत याःगु खः ।

बिहिबाः नुगलं सालाहयाः रथ ओकुबहालय् दिकूगु खःसा ओकुबहालं लगंख्यःपाखे सालायंकाच्वँच्वं थपाहिति थ्यंबलय् रथय् क्षति जुयाः जात्रा दथुइ हे दिकेमाःगु खः ।

थौं रथयात थपाहितिं सालायंकाः लगंख्यलय् यंकेगु ग्वसाः दु । जाउला जात्राय् भोटो क्यनेधुंकाः थुगुसीया बुंगद्यःया रथयात्रा क्वचाइ ।

यलया बुंगद्यःया रथयात्रा बांलाक क्वचाःसा वा बांलाक वयाः बालीनाली बांलाइगु, अन्नया दुःख मजुइगु जनविश्वास दु । थुगु रथयात्रायात नेपाःया हे दकले ताःहाकःगु जात्रा कथं काः ।

थ्व नं ब्वनादिसँः बुंगद्यःया रथयात्रा अनिश्चित