राजोपाध्याय समाज जिल्ला समन्वय समिति ख्वपया न्हूगु ज्यासना पुचः ल्यज्या क्वचाःगु दु ।

समाजं वंगु श्रावण १९ गते ख्वपया चोर्चाय् छगू ज्याझ्वः यासें जिल्ला समन्वय समितिया न्हूगु ज्यासना पुचः ल्यःगु खः ।

ख्वप समितिया न्हूगु ज्यासना पुचलय् गिरीश शर्मा राजोपाध्याययात संयोजक ल्यःगु दुसा माधुरी शर्मा राजोपाध्याय, रसिक शर्मा राजोपाध्याय, सरोजन राजोपाध्याय, मिला राजोपाध्याय, जयन्त शर्मा राजोपाध्याय व प्रितम राजोपाध्याययात दुजः ल्यःगु दु ।

ज्याझ्वलय् समाजया नायः संजय शर्मा राजोपाध्यायं समितिया न्हूगु ज्यासना पुचःया दुजःतयत खादां क्वखायेकादिल ।

ज्याझ्वः धुनाकथं च्वंगु जिल्ला समितिया न्हूगु ज्यासना पुचःया मुँज्यां माधुरी शर्मा राजोपाध्याययात समितिया छ्यान्जे व रसिक शर्मा राजोपाध्याययात दांभरिं ल्यःगु दु ।

व स्वयां न्ह्यःया ज्याझ्वलय् न्ववासें संस्कृतिविद् हरिशरण शर्मा राजोपाध्यायं स्थानीय धर्म, संस्कृति परम्पराया सामाजिक मान्यता दुनेया वैज्ञानिक अर्थ मालेमाःगु व थुइकेमाःगुलिइ बः बियादिल ।

अथेहे मेम्ह संस्कृतिविद् मृगेन्द्रराज सुवेदीं न्हूगु पुस्तायात समाजया संस्कृति परम्परा लःल्हायेगु ज्याय् न्ह्यज्यायेफयेमा धकाः जिल्ला समितिया न्हूगु ज्यासना पुचःयात भिन्तुना देछानादिल ।

समाजया नायः संजय शर्मा राजोपाध्यायं व्यक्तिगत वा छुं नं कथंया आग्रह पूर्वाग्रह मतःसे समाजया उत्थानया नितिं सकलें छधी जुयाः न्ह्यज्यायेमाःगुलिइ बः बियादिल ।

समाजया न्वकू बिराजकाजी राजोपाध्यायं संस्कृतिया पुस्तान्तरणय् बः बियादिल सा मेम्ह न्वकू रचना शर्मा राजोपाध्यायं न्हूगु पुस्तां मन तयाः समाजया उत्थानय् न्ह्यज्यायेमाःगु छ्याता बियादिल ।

उगु हे ज्याझ्वलय् ख्वप जिल्लां समाजय् न्हू दुजः जूपिन्त दसिपौलिसें समाजया ब्याच नं लःल्हाःगु खः ।

थ्वयां न्ह्यः वंगु असार २९ गते किशोर शर्मा राजोपाध्यायया कजिसुइ समाजया येँ जिल्लाया समन्वय समिति गठन याःगु खः ।

आः याकनं हे यल जिल्लाया समन्वय समिति नं गठन यायेत्यनागु समाजं धाःगु दु ।

क्वयया लिंकय् क्लिक यानाः भिडियाे स्वयादिसँ