म्येहालामि पुरु श्रेष्ठ व रेशा श्रेष्ठया देशभक्ति म्ये ‘मेरो नेपाल हाम्रो नेपाल’ सार्वजनिक जूगु दु ।

संगीतकर्मी बुद्ध सायमिया युट्युब च्यानल अडियो नेपालय् उगु म्ये सार्वजनिक जूगु खः ।

वंगु जुलाई ७ कुन्हु रिलिज जूगु उगु म्येया भिडियोय् म्येहालामि श्रेष्ठद्वयलिसें तःम्ह हे कलाकारं अभिनय याःगु दु ।

म्येय् टिकटकया ‘म गीत गाउन सक्छु’ ज्याझ्वःया टिमं अभिनय याःगु खः ।

संगीतकर्मी बुद्ध सायमिं सामाजिक संजाल टिकटकमार्फत न्हूपिं म्येहालामितयत कःघानाः न्हिथं हे ‘म गीत गाउन सक्छु’ ज्याझ्वः न्ह्याकावयाच्वनादीगु दु ।

व हे ज्याझ्वलय् नियमित रुपं ब्वति कयावःपिं कलाकारतयसं थ्व म्येय् सः बीगुलिसें अभिनय नं याःगु खः ।

म्यूजिक भिडियोया सुरुवाती लुं २०७२ बैसाख १२ गतेयात लुमंकाबी । वयां लिपा म्यूजिक भिडियोया लुइ नेपाःया थीथी जातजातिया प्रतिनिधित्व यासें कलाकारतयत थीथी जातजातिया वसतय् क्यनातःगु दु ।

म्येग्वः च्वयेगुलिसें लय तयेगु ज्या नं सायमिं हे यानादीगु दुसा म्यूजिक भिडियोया निर्देशन, छायाङ्कन व दृश्य सम्पादन नं वयकलं हे यानादीगु दु ।

छायाङ्कनय् सायमियात दश बहादुर महर्जनं ग्वहालि यानादीगु दु । कोरीयोग्राफी धाःसा मीरा डंगोलं यानादीगु दु ।