म्येहालामि पवित्र कसाः धालकि छम्ह म्येहालामि अले छम्ह रेडियो ज्याझ्वः न्ह्याकामि कथं नं यक्वसिनं म्हस्यू ।

छगू इलय् १०० मेगाहर्जय् प्रसारण जुइगु रेडियो नेपाल एफ.एम.य् चान्हसिया १०ताः इलंनिसें १२ताः ईतक वइगु गुडनाइट एफ.एम. नेपालभाषा ज्याझ्वलय् वयकलं न्ह्याकादीगु ‘जि नं म्ये हाले सः’ ज्याझ्वः थौंतक नं न्यनामितय् लुमंनि ।

अथे हे, वयकलं हालादीगु म्येत ‘मिखा बाला बाला, जि दुनुगलं यःम्ह मयजु’ नेवाः बिटल्सया म्येत, नेवाः बलिउड, नेवाः हलिउडया म्येत नं ल्वकंह्वाः ।

वयकःया छपु ल्वकंह्वाःगु म्ये ‘लँय् वल थौं गय् गय् ।’

खतुं थ्व म्ये भाजु कसाःया सलय् स्टुडियो रेकर्ड जुयाः पिदंगु मदुनि । दबुलिइ म्ये हालीबलय् अप्वः यानाः म्येहालामि कसाःजुं थुगु म्ये हालेगु हे यानाद्यू ।

लिसें लकडाउनय् नं वयकः लाइभय् वयाः म्ये हालीबलय् थ्व म्ये हालेगु यानाद्यू । छगू दबुलिइ हालादीगु थ्व हे म्येया भिडियो वयकलं थःगु हे युट्युब च्यानलय् अपलोड नं यानातयादीगु दु ।

‘जनकबि दुर्गालाल श्रेष्ठं च्वयादीगु थ्व म्येया म्येग्वः नं तसकं बांलाः, म्ये नं चिकीचाहाकः । अथेजूगुलिं हे जुइ, थ्व म्ये न्यंपिं सकसिनं धइथें ययेकू । अयजुयाः हे जिं न्ह्याथासं थ्व म्ये छपु हालेगु याना’ कसाःजुं थ्व म्येयात कयाः थःगु खँ न्यंकादिल ।

यक्वसिनं ययेकूगु व गुलिसिनं कभर नं यायेधुंकूगु थुगु म्ये थःगु हे सलय् छाय् रेकर्ड मजूगु ले ?

‘रेकर्डिङ यायेत ट्राएक नं दयेके सिधयेधुंगु खः । तर उबले थीथी प्राविधिक कारणं भ्वाइस तयेमफुत व अथें जुल । आः न्हूगु कथं म्यूजिक अरेंज याये, रेकर्ड याये ला धकाः बिचाः यानाच्वनागु दु’ थःगु ग्वसाः कसाःजुं न्यंकादिल ।

थुगु म्ये यक्व हे म्येहालामिपिन्सं नं ययेकूगु खनेदु । अयजुयाः हे नांजाःपिं म्येहालामिपिन्सं नं कसाःया थुगु म्येयात कभर यानादीगु दु ।

थ्व हे झ्वलय् थौं (बिहिबाः) हे तिनि ल्वकंह्वाःम्ह म्येमालामि मयजु दीपा महर्जनया सलय् थ्व म्ये पिदंगु दु । गिटारिस्ट रोहन शाक्यया युट्युब च्यानल ‘माइ गिटार होम’ य् थुगु म्येया म्यूजिक भिडियो थौं सनिलया ५ताः इलय् सार्वजनिक जूगु खः ।

म्येया मू हालामि पवित्र कसाः थुगु म्ये स्वयाः तसकं लयतायादीगु दु ।

‘म्येयात तसकं बांलाक संगीत संयोजन यानातःगु दु, हालातःगु दु । म्यूजिक भिडियो नं स्वयाच्वने थें जू, सिम्पल एकदम बांलाः, म्ये स्वयाः जिः ला तसकं लयताः’ कसाःजुं धयादिल ।

दीपां हालादीगु थुगु म्येया संगीत संयोजन रोहन शाक्यं हे यानादीगु दु । नापं रोहनं म्येया म्यूजिक भिडियोलय् अभिनय तकं यानादीगु दु । भिडियोलय् अभिनयलय् रोहनयात मोडल मिला शाक्यं साथ बियादीगु दु ।

म्येया छायाङ्कन, भिज्युअल एडिटिङ, निर्देशन अर्जुन खड्गीं यानादीगु दु ।

म्ये न्यनेबलय् अले हालाबलय् आनन्द वः । व हे आनन्दय् दुबिना म्ये हाला, थौं म्यूजिक भिडियो तकं दयेकाः पिदंगुलिइ जि लयताः’ म्येहालामि दीपां धयादिल

थुलि बांलाःगु म्ये हालेखंगु धासें म्येहालामि दीपा नं उलि हे लयताः ।

‘जितः थ्व हालेत रोहनं सःतूगु खः । म्ये न्यनेबलय् अले हालाबलय् आनन्द वः । व हे आनन्दय् दुबिना म्ये हाला, थौं म्यूजिक भिडियो तकं दयेकाः पिदंगुलिइ जि लयताः’ म्येहालामि दीपां धयादिल ।

गिटारिस्ट लिसें थुगु म्येया संगीत संयोजक रोहनं थ्व म्ये पवित्र कसाः भाजुयात छगू सरप्राइजया रुपय् दयेकादीगु खनी । म्ये कभर यायेत ला वयकलं परमिसन कयादिल तर, सुनां हालेत्यंगु धइगु खँ लिसें म्यूजिक भिडियो तकं दयेकेत्यना धयागु खँ कनामदीगु हे जुयाच्वन ।

‘थ्व म्ये जितः नं तसकं यः । अले पवित्र दाईयात सरप्राइज बीगु ल्याखं थ्व म्ये कभर यायेमास्ते वल धया । वयकलं ज्यू धया । थौं छगू सरप्राइज गिफ्ट कथं थ्व म्ये जिं वयकःयात हे गिफ्ट याना का’ शाक्यं धयादिल ।

थुगु म्येयात थ्व स्वयां न्ह्यः न्यादँ न्ह्यः हे उजं शाक्यं नं कभर यानादीगु दु । लिसें स्वदँ न्ह्यः निभाः डंगोलं नं हालाः रेकर्ड यानादीगु दु व थुकिया म्यूजिक भिडियो नं पिदंगु दु । निदँ न्ह्यः निश्चल मानन्धरं नं कभर यानाः युट्युबय् अपलोड यानादीगु दु ।

‘थ्व म्येयात उलिमछिसिनं ययेकाः हालादीगु धइगु जिगु लागिं ला लसताया हे खँ खः । सकसिनं थःथःगु पहलं थुगु म्येयात तसकं बांलाक हालादीगु दु । जिं नं याकनं हे रेकर्ड यायेगु जुइ’ कसाःजुं धयादिल ।

थ्व म्येया नापं जनकबि श्रेष्ठया प्यपु, न्यापु म्येय् लय् तयेधुनागु वयकलं धयादिल । थुगु म्येत वयकलं लकडाउनया इलय् लाइभय् हाला नं दीगु दु ।

थ्व दक्वं म्ये आकिवं तक रेकर्ड यानाः पिथनेगु ग्वसाः दुगु खँ नं वयकलं इबुखँयात कनादिल ।