आदिवासी जनजाति समुदायं थःगु हे मौलिक कथावस्तुइ संकिपा दयेकेत सरोकारवालातयसं इनाप याःगु दु ।

नेवाः फिल्म सोसाइटीं ग्वसाः ग्वःगु प्यन्हुयंकया ‘आदिवासी जनजाति संकिपाया कथावस्तु छनौट’ विषयक कार्यशाला गोष्ठीया वंगु बुधबाः जूगु समापन समारोहया वक्तातयसं थथे इनाप याःगु खः ।

ज्याझ्वलय् न्ववासें आदिवासी जनजाति चलचित्र महासंघया नायः पुर्खाजित राईं नेवाः समुदायया थःगु हे मौलिक कथावस्तुइ संकिपा दयेकूसा स्तरीय संकिपा निर्माण जुइगुलिसें समुदायया सः राज्यतक थ्यंकेगु माध्यम नं जुइगु खँय् बः बियादिल ।

‘नेवाः समुदाय भाषा, कला, संस्कृति दक्वं खँय् तःमि, थःगु हे समुदायया सामग्रीयात संकिपाया कथावस्तु दयेकूसा संकिपाया स्तर यक्व हे थहांवइ । लिसें संकिपाया माध्यमं थःगु हक अधिकारया सः नं बुलन्द जुइ’ महासंघया नायः राई धयादिल ।

आदिवासी जनजाति सम्वद्ध संघसंस्थात प्रशासनिक क्षेत्रय् ल्यूने लानाच्वंगु धासें संस्था दँयदसं माःकथंया प्रशासनिक प्रकृया पूवंकेत राईं इनाप यानादिल ।

चलचित्र विकास बोर्ड अन्तर्गतया आदिवासी जनजाति मातृभाषी चलचित्र प्रवर्द्धन समितिया कजि ज्योति राज राईं नेवाः समाजयाके संकिपाया नितिं अल्याख कथावस्तु दुगु धयादिल ।

‘नेवाः समाजयाके ला संकिपाया नितिं असंख्य कथावस्तु दु, छथाय् द्वँचिनाच्वंगु अज्याःगु कथावस्तुइ छगू चिकिचाधंगु विषय लिकात धाःसां गाः । वाः चायेकेमाल, स्वये जक माल’ समितिया कजि राईं धयादिल ।

कार्यशालाया श्रोत व्यक्तिद्वय विजयरत्न असंबरे व आर्यम नकःमिं कार्यशालापाखें सयेकागु सीकागु ज्ञानयात व्यवहारय् छ्यलेत कार्यशालाया ब्वतिमितयत इनाप यानादिल ।

नेवाः फिल्म सोसाइटीया नायः बिराजकाजी राजोपाध्याय व निवर्तमान नायः लुःजः सिंहं नेवाः संकिपाया स्तर थकायेगु नितिं व आदिवासी जनजाति संकिपाया सः राज्य तहतक थ्यंकेगु नितिं सोसाइटी क्रियाशील जुयाच्वनीगु धयादिल ।

ज्याझ्वलय् कार्यशालाया ब्वतिमितलिसें श्रोत व्यक्तितयत महासंघया नायः राईं दसिपौ लःल्हानादीगु खः ।

वंगु तछलागा पारुनिसें पञ्चमीतक जूगु प्यन्हुया कार्यशालाय् नेवाः संकिपा ख्यलय् सक्रिय कलाकारपिं श्यामसुन्दर शिल्पकार, सुरज ब्यन्जनकार, मन्जु श्रेष्ठ, संयुक्त स्थापित तकंया ब्वति दुगु खः ।