संकिपा छगू दयेकेत निर्माता लाखौं लगानी याइ । लगानी जक यानां नं मगात, प्राविधिक व कलाकारतयसं उतिकं हे मेहेनत नं यायेमानि ।

परिकल्पनाकारं बाखंया परिकल्पना याइ, कथाकारं बाखं च्वइ । उलिं मगात, हाकनं उकिया पटकथा, संवाद दक्वं तयार यायेमाल ।

कलाकार ल्ययेगु, सुटिङ यायेत कलाकारतय् समाः, सीन अनुसार लाइटम्यानया लाइट संयोजन, छायाङ्कन, निर्देशकया निर्देशनय् फिल्मया सुटिङ जुइ ।

सुटिङ सिधयां जक गात ला, भिज्युअल एडिटरं सुटिङ यानाः हःगु हरेक सटयात ल्यत्तुल्यल्यं बांबांलाःगु ओक सट मुंकाः भिज्युअल एडिटिङ याइ, ब्याकग्राउन्ड स्कोर तयेगु, कलर प्रोसेसिङ यायेगु ।

अझ थुलि खँ ल्हानाच्वँच्वं संकिपाया म्येया पार्ट ला त्वः हे फित तिनि । .गुलि ज्या यायेमाः छगू संकिपा तयार जुइ ।

थज्याःगु हे प्रवृत्तिं गुलिखे संकिपाकःमिं ला आवंलि नेपालभाषाया संकिपाय् लगानी याये हे मखुत मधाःगु नं मखु

उलिमछिसिया मेहेनतं, योगदानं छगू फिल्म तयार जुइ, हलय् वइ, उकिया टिकट मीगु ज्या नं जुइ । तर अप्वः संकिपा दयेकीपिनि नुगलय् स्याइगु खँ, टिकट ज्वनावनेबलय् मनूतयसं धयाहइ, ‘छंगु फिल्म नं जिं टिकट न्यानाः स्वःवयेमाःगु ला ? ग्व, पास मदुला ?’

छम्ह निम्हेसिया मखु, थ्व अनुभव अप्वःथे नेपालभाषा संकिपाकःमितय् दु । थज्याःगु हे प्रवृत्तिं गुलिखे संकिपाकःमिं ला आवंलि नेपालभाषाया संकिपाय् लगानी याये हे मखुत मधाःगु नं मखु ।

धायेगु खःसा थज्याःगु प्रवृत्ति संकिपा ख्यः जक मखु, मुक्कं कला ख्यःया हे नितिं बांलाःगु मखु ।

‘थौंकन्हय् छुं नं सितिकं जुइमखु, फिल्म दयेकेगु न अःपूगु ज्या खः, न आर्थिक ल्याखं भचा भचा धेबां गाः । लखौं लाय् तयाः, उलिमछि मेहेनत यानाः संकिपा दयेकाहइ, अले टिकट छपाः न्यानाबीत नुगः स्यानाः पास मदुला धालकि जिमि नुगलय् ला स्याइ नि’ सिनेमाटोग्राफरलिसें निर्देशक रवि सायमिं धयादिल ।

आः थज्याःगु प्रवृत्तिया अन्त्य यायेगु नितिं थःपिं न्ह्यज्यायेगु निर्देशक सायमिं धयादीगु दु ।

नेपालभाषाया न्हूगु संकिपा ‘तिबः, द सपोर्ट’ या शो लिसें थीथी पक्षया बारे जानकारी बीत बिहिबाः येँय् जूगु पत्रकार सम्मेलनय् निर्देशक सायमिं थथे धयादीगु खः ।

पास माल धायेगु प्रथाया अन्त्य यासें नेवाः संकिपायात तिबः बीमाः धइगु भावना विकास यायेगु आज्जुं थःपिं न्ह्याःवनागु सायमि धयादिल ।

‘स्वसः, प्यसः धयागु थौंकन्हय् छु खः ? नेवाः संकिपाया टिकटया मू थुलि हे मखुला जुइगु ? आम स्वकुमिं जिं छपाः टिकट न्यानाः संकिपा स्वःवनकि नेवाः संकिया ख्यःयात तिबः जुइ धइगु भावना ब्वलंकेमाल’ सायमिया धापू खः ।

फिल्मया प्रिमियरय् पास इनेगु, समयबजि नकेगु थुज्वःगु ज्या आः सकल संकिपाकःमितयसं बन्द यायेमाःगु बिचाः नं वयकलं तयादिल ।

तिबः संकिपाया निर्माता सर्जु रंजितं नेवाः संकिपा ख्यःयात छगू तिबः हे साबित जुइमा धकाः थःपिन्सं संकिपाया नां हे तिबः तयागु खँ कनादिल ।

‘नेवाः संकिपा धयागु न्ह्यइपुकेगु जक मखु, भाषा व समुदायया उत्थानया छगू माध्यम नं खः । थ्व ख्यःयात सकलें जानाः तिबः बीमाः धयागु जिमिगु मान्यता खः । स्वइत जबरजस्ती टिकट मीत मखसें, तिबःया भावना विकास यायेगु जिमिगु आज्जु खः’ निर्माता रंजितं धयादिल ।

तिबः संकिपाया छायाङ्कार लिसें कलरिंग यानादीम्ह अमर चित्रकारं न्हापा थम्हं म्ये हालाः जिगु म्हगस नामं म्यूजिक एलबम पिकयाबलय् नं मनूतयसं सिडि छचाः नं जितः बी मफुला धाइगु खँ लुमंकुसें अज्याःगु बिचाः न्हंकेगु कुतः थःपिन्सं न्ह्याकागु धयादिल ।

‘उलिमछि दुःख सियाः म्यूजिक एलबम पिकया, जितः छचाः सितिकं बी मफुला धाइगु । संकिपाया टिकट कयाबीमाल धाःसा पास माल धाइगु । आः थ्व बिचाः न्हंकेमाः, पास मखु टिकट न्यानाः संकिपा स्वयेमाः धइगु बिचाःया विकास यायेमाल’ छायाङ्कार चित्रकारं धयादिल ।

पत्रकार सम्मेलनय् तिबः संकिपाया संगीतकार भुपेन्द्र बज्राचार्य व म्ये च्वमि संघरत्न शाक्यं नं थःथःगु बिचाः तयादीगु खः ।

पत्रकार सम्मेलनय् निर्देशक सायमिं वर्तमान परिस्थितिइ समाजय ब्वलनाच्वंगु समसामायिक कथावस्तुइ झिच्यालाया अथक प्रयास लिपा संकिपा दयेकाः पितहयागु धयादिल ।

मांबौयात त्वःता मस्त विदेश पलायन जुइगु बाध्यतायात संकिपाःया माध्यमं पिब्वयागु धाःगु दु ।

न्हूपिं पुलांपिं नेपाःयालिसें अमेरिकाय् च्वंपि कलाकारतयगु तकं भूमिका दुगु संकिपा ४०६५ मिटर च्वय् पिके व ३१४६ मिटर च्वय् सैलुंग थुज्वःगु हिमाली लागा व अमेरिकाया मेरील्याण्डय् तकं सुटिङ यानातःगु दु ।

संकिपाया बाखं ओमशंकर श्रेष्ठं च्वयादीगु दुसा पटकथा ओमशंकर, सुशील राजोपाध्याय व निर्देशक सायमिं थम्हं नं च्वयादीगु दु ।

संघरत्न शाक्य, राजेन्द्र महर्जन, ओमशंकर श्रेष्ठं च्वयादीगु म्येग्वःयात भुपेन्द्र बज्राचार्य, शिव शाही व सुशील राजोपाध्यायं संगीत बियादीगु दु ।

अथेहे, संकिपाया म्येत सतिस महर्जन, दिपा महर्जन, सरस्वती मानन्धर, गौतम दास मानन्धर, राजीव राजोपाध्यायलिसें निर्माता सर्जु रंजित व छायाङ्कार अमर चित्रकारं नं हालादीगु दु ।