नेवाः पत्रकार राष्ट्रिय दबुलिं बहुजातीय, बहुभाषिक र बहुसांस्कृति विविधतां जाःगु नेपालय् थीथी भाषाया माध्यमं बुखँ प्रकाशन व प्रसारण जुइगु समावेशी सञ्चारमाध्यमया आयाम जूगु धाःगु दु ।

नेपाल टेलिभिजनय् नेपालभाषाया बुखँ प्रसारण लिसें राष्ट्रिय समाचार समितिइ नेपालभाषा लिसें मैथिलि भाषाय् न्यूज बुलेटिन प्रकाशन जूगु सन्दर्भय् प्रेश विज्ञप्ती जारी यासें पत्रकार राष्ट्रिय दबुलिं थथे धाःगु खः ।

प्रेश विज्ञप्तीमार्फत पत्रकार दबुलिं नेपाल टेलिभिजनं नेपालभाषां समाचार प्रसारण जूगुलिइ देयन्यंकया हे नेवार पत्रकारतय् राष्ट्रिय संगठन दबू तसकं लयताःगु धाःगु खः ।

दबूया नायः नृपेन्द्रलाल श्रेष्ठं जारी यानादीगु विज्ञप्तीइ नेपालभाषाया पत्रकारिता सुरुआत जूगु सछि दँ थ्यंगु अवसरय् मातृभाषा शताब्दी दँ व संयुक्त राष्ट्र संघं भाषा दशक हनाच्वंगु सन्दर्भय् उगु ज्यां थप महत्व उजागर जूगु धाःगु दु ।

‘नेपालया संविधानया धारा ६य् नेपालय् न्ववाइगु दक्वं भाषा राष्ट्रभाषा खः धयातःगु दु । नेपाल टेलिभिजनं हरेक प्रदेशय् बाहुल्य दुगु निगू÷निगू भाषाय् बुखँ प्रसारण यायेगु आज्जु कयाः उकियात छसिकथं कार्यान्वयन यायेबलय् संविधानया व मर्म व भावनाया व्यवहारिक अनुवाद जूगु थुगु संस्थाया ठहर दु’ विज्ञप्तीइ च्वयातःगु दु ।

व हे विज्ञप्तीमार्फत दबुलिं दबूलिसें आदिवासी जनजाति पत्रकार महासंघ (फोनिज), मधेसी पत्रकार समाज लिसेंनं थ्व विषयस सम्वन्धित निकाय, सरोकारवालातयत मदिक्क ध्यानाकर्षण याकावःगु नं लुमंकूगु दु ।

नेपाल टेलिभिजनं वंगु असोज ३० बुधबाःनिसें नेपालभाषां बुखँ प्रसारण न्ह्याकूगु खः । बुधबाः सूचना तथा संचार प्रविधिमन्त्री पृथ्वीसुब्बा गुरुङं नेपाल टेलिभिजनय् नेपालभाषा न्यूज बुलेटिनया शुभारम्भ यानादीगु खः ।

व इलय् मन्त्री गुरुङं सरकारी संचारमाध्यमय् न्ह्याकूगु भाषिक ज्याझ्वलं मुक्कं समुदाययात सरकारी संचारमाध्यमप्रति अपनत्व महसूस याकीगु बिचाः तयादीगु खः ।

ज्याझ्वलय् मन्त्रालयया सचिव राधिका अर्याल, नेपाल टेलिभिजनया नायः समीरजंग शाह लिसेंनं नेपालया विविध भाषा, संस्कृतिया संरक्षणय् न्ह्यज्यानाच्वनेगु धयादीगु खः ।

ज्याझ्वलय् नेपाल टेलिभिजनया महाप्रवन्धक फुलमान बल, भाषा आयोगया दुजः सुरेश किरण मानन्धर, फोनिजया नायः गजुरधन राई व पत्रकार दबूया नायः नृपेन्द्रलाल श्रेष्ठ लिसेंया उपस्थिती दुगु खः ।

थ्वयां न्ह्यः वंगु असोज २९ गतेनिसें राष्ट्रिय समाचार समितिं नं नेपालभाषालिसें मैथिलि भाषां न्यूज बुलेटिनया प्रकाशन न्ह्याकेधुंकूगु दु ।