तःजिक क्वचाल ‘न्यू जेनिथ डे’
eBukhan – बिराज, २०८१ मङ्सिर ३०, आइतबार वर्गीकृत समाज

छितः खालिगु बोटल छगः ब्यूसा छु यानादी ? पक्का नं त्वनेगु लः तयादी जुइ अथवा उकी तयेज्यूगु मेगु छुं उकी तयेज्यूगु सामान तयादी जुइ । आः व हे बोटल छेँय् मचायात बियादिसँ सा । लाःसा वं उगु खालिगु बोटलयात बुंगद्यः दयेकाबी ला !
‘छु खँ ल्हाइ ल्याः, बोटलया बुंगद्यः हं । मचातयसं ला बोटल तछ्यानाबी फु । उकिया खाः कुचां घाः जुइफु ।’ थथे ला बिचाः यानामदिया ला ? खःसा छिगु बिचाः गलत जुइफु न्हि ।
न्यू जेनिथ इङ्गलिस मोडल स्कूलया न्यू जेनिथ डे मेला चाःहिलेधुंकाः यक्वसिया बिचाः हिल जुइ । खाली बोटलयात बुंगद्यः, अन्नपूर्ण कलशलिसें थीथी कलात्मक रुप बिल न्यू जेनिथया विद्यार्थीतयसं ।
ताम्सीपाखा विष्णुमति लिंकरोडस्थित स्कूलं विद्यार्थीतयसं दयेकूगु थज्याःगु हे कलात्मक ज्वलंलिसें थीथी ब्वज्या व सांगितिकि ज्याझ्वःलिसें शनिबाः स्कूल परिसरय् न्यू जेनिथ डे ज्याझ्वःया ग्वसाः ग्वःगु खः ।
स्कूलया न्यागुलिं ब्लकय् थीथी ब्वज्या, कासा, फुड स्टल, व सांगितिक प्रस्तुतिलिसें ज्याझ्वःया ग्वसाः ग्वःगु खः ।
थुगु ज्याझ्वलय् वयाःलि झीसं थः मचातयत किताब जक ब्वंकेगु मयासे थुकथंया रचनात्मक ज्याया लागिं हःपाः बीमाः धइगु ताल जितः
थ्व झ्वलय् स्कूलया ब्लक ‘सी’लय् विद्यार्थीतयसं दयेकूगु बोटल आर्टलिसें चित्रकला व थीथी कलात्मक हलंज्वलं ब्वज्याय् तःगु खः ।
‘झीसं वांछ्वयेगु बोटलय् विद्यार्थीतयसं कला खनीगु जुयाच्वन । थुगु ज्याझ्वलय् वयाःलि झीसं थः मचातयत किताब जक ब्वंकेगु मयासे थुकथंया रचनात्मक ज्याया लागिं हःपाः बीमाः धइगु ताल जितः’ छम्ह अभिभावकं धयादिल ।
‘ए’ व ‘बी’ ब्लकय् न्ह्यवसालिसें थीथी हलंज्वलंया स्टल, फुड स्टललिसें सांगितिक ज्याझ्वः याःगु खः । स्कूलया होटल म्यानेजमेन्ट संकायया ११, १२ कक्षाया विद्यार्थीतयसं फुड स्टलया संयोजन याःगु खः ।
फुड स्टलय् ममः, पानीपुरी, चटपटे थुज्वःगु नसा ज्वलं जक मखसें नेवाः नसा वः, चतांमरि, समयबजि, यःमरि नं दुगु खः ।
‘विद्याथीतयगु प्रतिभा सकसिनं खनेमा व विद्यार्थीतयसं स्थानीय संस्कृति, परम्परायात बांलाक थुइमा धइगु ज्याझ्वःया आज्जु खः । विद्यार्थीतयसं कितावी ज्ञान जक मखसें, व्यवहारिक ज्ञान कायेगु हे मुख्य खँ खः’ स्कूलया प्रिन्सिपल राजु महर्जनं धयादिल ।
लिसें स्कूलया विद्यार्थी, शिक्षक शिक्षिकां म्ये व हुलाप्याखं न्ह्यब्वःगु खः । अथेहे, समीर श्रेष्ठ, सुरज एन्ड एलुरीज ब्यान्ड व न्यू जेनिथ अर्केस्ट्रा ब्यान्डं सांगितिक न्ह्यब्वया न्ह्यब्वःगु खः ।
फोक इन्स्ट्रुमेन्टल ब्यान्ड न्यू जेनिथ अर्केस्ट्राया न्ह्यब्वया स्वकुमितयसं तसकं ययेकूगु खः ।
विद्यार्थीतय न्ह्यब्वयालिसें प्रतिभा खनाः येँ महानगरपालिका १८ वडाया वडाध्यक्ष न्हुछेकाजी महर्जन नं तसकं प्रभावित खनेदुगु खः ।
‘थःगु हे वडा दुनेया विद्यालयया विद्यार्थीतय् प्रतिभा खनाः तसकं लयताल । स्कूलं पाठ्यक्रमया सफूया लिसें अतिरिक्त क्रियाकलापय् गुकथं बः ब्यूगु दु धइगु थुगु ज्याझ्वलं क्यनाच्वंगु दु’ वडाध्यक्ष महर्जनं धयादिल ।
ज्याझ्वःया समुद्घाटन वडाध्यक्ष महर्जनलिसें प्याब्सनया न्वकू गोपाल राज आचार्यं मंकाः रुपं रिबन चानाः यानादीगु खः । ‘
डी’ ब्लकय् ह्यान्ड राइटिङ व ‘ई’ ब्लकय् रोबोटिक्स हलंज्वलंया ब्वज्या दुगु खः ।
मेला चाःहिलेधुंकाः सिइइएफया नायः तकं खःम्ह प्याब्सन न्वकू आचार्य नं उतिकं हे प्रभावित खनेदुगु खः ।
‘थनया विद्यार्थीतय् कला, विद्यार्थीतय् ह्यान्ड राइटिङ, भौतिक विज्ञानया ज्ञान च्वछायेबहःजू । थ्व मचातयसं दयेकूगु मखसें वैज्ञानिकतय् हे ज्या थें खनेदु’ आचार्यया धापू खः ।
सुथय् ११ताः इलंनिसें सनिलया ४ताः इलयतक जूगु ज्याझ्वलय् न्याद्वः स्वयां अप्वःसिनं अवलोकन याःगु स्कूलं धाःगु दु ।
वि.सं. २०५७ सालय् स्थापित न्यू जेनिथ स्कूलया स्थापना दिवसया लसताय् थुगु ज्याझ्वःया ग्वसाः ग्वःगु खः ।