बौद्ध म्ये ‘दिपकंर बुद्धया..’ या छायाङ्कन क्वचाल

eBukhan – बिराज,    २०८१ जेठ ६, आइतबार    वर्गीकृत मनोरञ्जन

२५६८क्वःगु स्वांया पुन्हि सतिनाच्वंबलय् बुद्धया हसनालिसेंया थीथी न्हूगु कृतित सार्वजनिक जुयाच्वंगु दु ।

थ्व हे झ्वलय् बुद्धया हसनामूलक नेपालभाषाया म्ये ‘दिपंकर बुद्धया साक्षात धर्म....’ या म्युजिक भिडियो छायाङ्कन क्वचाःगु दु ।

म्हिगः शनिबाः बुद्धवारी, दिपंकर बुद्ध विहार परिषरय् म्येया छायाङ्कन जूगु खः ।

म्यूजिक भिडियोया निर्देशन संगीत कलाकर्मय् ताः इलंनिसें निरन्तर सक्रिय जुयावःम्ह वरिष्ठ च्वमि, निर्देशक पवन जोशीं यानादीगु दु ।

निर्देशक जोशीया निर्देशनपाखें थ्व ११४गूगु म्युजिक भिडियो खः ।

‘ल्याः गुलि जुल धयागु स्वयां कर्मया निरन्तरताया खँ खः । ज्या यानाच्वनागु दु, ज्याया निरन्तरतालिसें सकसिगु मतिना व विश्वास चूलानाच्वंगु दु’ निर्देशक जोशीं धयादिल ।

म्ये च्वयेगुलिसें लसय् हनादीम्ह श्रीमिला सुवालं म्यूजिक भिडियोलय् अभिनय नं यानादीगु दु । छायाङ्कन व दृश्य सम्पादन राजेश शाक्यं यानादीगु दु ।

म्येहालामि सरस्वती मानन्धरं म्येय् थःगु सः बियादीगु दु ।

म्यूजिक भिडियो याकनं दयेके सिधयेकाः याकनं हे विश्वब्यपी रिलिज यायेगु म्येच्वमि, लयचिनामि सुवालं धयादिल ।