वागमती प्रदेशया संस्कृति पर्यटन तथा सहकारी मन्त्री शैलेन्द्रमान बज्राचार्यं आःया ल्यायम्ह पुस्तां राजनीतिइ च्यूताः तयेमाःगुलिइ बः बियादीगु दु ।

वंगु बिहिबाः येँय् नेपाः युथ सांस्कृतिक पुच ग्वसाः ग्वःगु ज्याझ्वलय् न्ववासें मन्त्री बज्राचार्यं थथे बः बियादीगु खः ।

राजनीतिइ च्यूताः तयेगु धायेवं तुं छुं दल विशेषय् हे दुहांवनेगु मखसें राज्यया नीतिया खँय् सकसिनं च्यूताः तयेमाःगु वयकःया धापू खः ।

‘राज्यया छु गज्याःगु नीति दु ? देया संविधान, कानूनं छु गज्याःगु विषयस छु गुकथं व्याख्या याःगु दु, उकी सकसिनं अध्ययन यायेमाः, सकसिनं सीकेमाः ।

राजनीतिइ ल्यायम्ह पुस्तां च्यूताः तःसा देयया विकासय् तिबः जूवनी’ मन्त्री बज्राचार्यं धयादिल ।

समाजय् राजनीति धयागु फोहोरी खेल जक खः धइगु छवि दयाच्वंगुलिइ राजनीति धयागु देय विकासया लँपु खः धकाः ल्यायम्ह पुस्तां सावित यायेमाःगु बिचाः बज्राचार्यं तयादिल ।

नेपाः युथ अर्गनाइजेसनया भातृ संगठन नेपाः युथ सांस्कृतिक पुचलं वंगु बिहिबाःनिसें निलात्याया धिमेय् प्रशिक्षण न्ह्याकूगु खः ।

बिहिबाः नासः पूजा यासें प्रशिक्षणया विधिवत् सुरुवात याःगु खः ।

व हे प्रशिक्षण ज्याझ्वःया औपचारिक उलेज्या ज्याझ्वलय् मन्त्री बज्राचार्यं ल्यायम्हतयसं धिमेयलिसें मूर्त, अमूर्त सांस्कृति सम्पदा, संस्कृतिप्रति क्यंगु च्यूताःया प्रशंसा यासें ।

आः परम्परागत संस्कृतिनिसें राजनीतियात ल्यंकेगु भाला तकं ल्यायम्ह पुस्तायाके हे वःगु वयकलं धयादिल ।

भूमि आयोग येँ जिल्ला समितिया नायःलिसें नेपाः युथ अर्गनाइजेसनया संस्थापक नायः श्यामकृष्ण प्रजापतिं स्थानीय धर्म, संस्कृति, परम्पराया संरक्षण सम्वर्द्धनय् अर्गनाइजेसनं निरन्तर ज्या यानावयागु व उकिया हे झ्वलय् थ्व प्रशिक्षण ज्याझ्वःया नं ग्वसाः ग्वयागु धयादिल ।

प्रशिक्षणया लागिं व्यवस्थापकिय पक्ष्या छुं खर्चया ल्याखं जक प्रशिक्षाथीतयके न्यून शुल्क कयागु व विपन्न परिवारया प्रशिक्षार्थीतयत निःशुल्क हे प्रशिक्षण बीत्यनागु जानकारी प्रजापतिं बियादिल ।

नेपाः युथ अर्गनाइजेसनया कार्यवाहक नायः विजय डंगोल, पुचःया नायः आर्यन महर्जनं संगठनं स्थानीय धर्म, संस्कृति, परम्पराया संरक्षणलिसें सामाजिक क्षेत्रमा निरन्तर सक्रिय जुयाच्वनेगु प्रतिवद्धता प्वंकादिल ।

ज्याझ्वलय् कानून व्यवसायीलिसें अर्गनाइजेसनया कानूनी सल्लाहकार युद्धमान महर्जन, देय् बाजा गुरु शेषनारायण महर्जनया नं उपस्थिती दुगु खः ।