महालक्ष्मी विकास बैंकं थःगु ३०क्वःगु स्थापना दिवस हंगु दु । बैंक ३०दँ क्यंगु लसताय् देयन्यंकया कचा ज्याकुथिइ वित्तीय साक्षरतालिसेंया नसंचा उलेज्याझ्वः यानाः स्थापना दिवस हंगु खः ।

व झ्वलय् बैंकया प्रादेशिक अले कचा ज्याकूया कर्मचारीतय् ब्वतिइ शनिबाः सुथय् वित्तीय साक्षरतालिसेंया नसंचा उलेज्याझ्वः याःगु खः ।

बैंकया केन्द्रिय ज्याकू दरबारमार्गं न्ह्याःगु नसंचा उलेज्याझ्वः महानगरीय प्रहरी वृत्त दरबारमार्ग, महेन्द्र शालिक, घण्टाघर, रत्नपार्क, भद्रकाली, शहिद गेट, लुँहिति, जमः जुयाः हाकनं बैंकया केन्द्रिय ज्याकुथिइ हे थ्यंकाः क्वचाःगु खः ।

नसंचा उलेज्याझ्वलय् बैंकया कर्मचारीतयसं मोवाईल बैंकिङ्ग, स्मार्ट क्युआर, निक्षेप, कर्जा, विप्रेषण आदिलिसेंया बैंकिङ सेवाया प्लेकार्ड ज्वनाः चाःह्यूगु खः ।

बैंकं २९ दँया दुने ग्राहकवर्ग, शुभचिन्तक, नियामक निकाय लिसें शेयरधनीतपाखें चूलाःगु विश्वास, स्नेह, सद्भाव व मार्गनिर्देशनया नितिं कृतज्ञता प्वंकूगु दु ।

लिसें ग्राहकया सन्तुष्टि व संस्थागत सुशासनयात लिनाः भविष्यय् अझ सरल, सहज व विश्वसनीय बैकिङ्ग सेवाया पहुँच मुक्कं नेपाःमिया दथुइ थ्यंकेगु प्रतिबद्धता नं बैंकं प्वंकूगु दु ।

बैंक वइगु जेठ ७ गते ३०दँ क्यनेत्यंगु दु ।