थौंकन्हय् बेलायतय् च्वनावःम्ह ओजेश सिंहं च्वयादीगु मचा साहित्यिक कृति ’लन्डन लाखे’ सार्वजनिक जूगु दु ।

पासा पुचः बेलायतया पुर्व नायः तकं खःम्ह सिंहं च्वयादीगु उगु सफूया शुक्रबाः येँय् जूगु छगू ज्याझ्वलय् विमोचन जुल ।

ज्याझ्वलय् येँ महानगरपालिकाया उपप्रमुख सुनिता डङ्गोल, साहित्यकार लिसें नेवाः न्ह्यलुवा मल्ल के. सुन्दर, साहित्यकार राजभाइ जकःमि, साहित्यकार स्नेह सायमिलिसें सफू च्वमि सिंहं मंकाः रुपं सफू विमोचन यानादीगु खः ।

सफू नेपालभाषाया लिसें अंग्रेजी भाषां च्वयातःगु दु ।

ज्याझ्वलय् न्ववासें येँ मपा उपप्रमुख डङ्गोलं थुगु सफुतिं नेवाः समुदायया इतिहास व तजिलजियात न्हूगु पुस्ताय् पुस्तान्तरण यायेत महत्वपूर्ण भूमिका म्हितीगु बिचाः तयादिल ।

विमोचित सफुतिं नेवाःत न्ह्याथाय् वंसां थःगु तजिलजि, परम्परा नं नापं यंकू धकाः क्यंगु धयादिल ।

‘नेवाःत गन गन वनी, थःपिनिगु सिस्टम नं नापं हे यंकी, गुगु सिस्टमयात गुथि धाइ । लन्डन वंम्ह नेवाः थः याकःचा मवंसे थनया दकले तःधंगु परम्परा गुथियात नं नापं यंकल धइगु सफुतिइ खनेदु’ उपप्रमुख डंगोलया धापू खः ।

नेवाः न्ह्यलुवा मल्लं सफुतिं लाखेया बारे समाजय् व्याप्त भ्रम त्वाःथलीगु विश्वास प्वंकादिल ।

‘थ्व प्राचीन नेपालमण्डलय् निगू कथंया जीवन मूल्य, जीवन अवधारणा, जीवनशैली अथवा भ्याल्यू सिस्टम दु । थ्व भाल्यू सिस्टममध्ये लाखय् छगू भ्याल्यू सिस्टमया सिम्बोल खः’ नेपालभाषा एकेडेमिया भाइस चान्सलर तकं खःम्ह अधिकारकःमि, साहित्यकार मल्लं धयादिल ।

साहित्यकार जकःमि, सायमि लिसेंनं नेवाः तजिलजियात विदेशी भूमिइ हे निरन्तरता बियाः थुकिया संरक्षण व प्रवर्द्धनय् जाःपिं ओजेश सिंहलिसें विदेशय् च्वनाच्वंपिं नेवाः समुदायया योगदान च्वछायेबहःगु धयादिल ।

सफू रातो घर फाउन्डेसनं बजारय् हःगु दु ।