यल महानगरपालिकां (यलमपा) मातहतया संस्थागत विद्यालययात नेपालभाषा पाठ्यक्रम ब्वंकेत निर्देशन ब्यूगु दु ।

मातहतया दक्वं संस्थागत विद्यालयया नामय् पत्र जारी यासें यलमपां नेपालभाषा पाठ्यक्रम मब्वंकानिगु जूसा अनिवार्य रुपं ब्वंकेगु व्यवस्था यायेत धाःगु खः।

यलमपा शिक्षा महाशाखाया प्रमुख महेन्द्र बहादुर क्षेत्रीं जारी यानादीगु पत्रय् कक्षा ३ तक नेपालभाषा पाठ्यक्रम लागू जुइधुंकूगु व वयां च्वयया कक्षाया पाठ्यक्रम तयार यायेगु ज्या जुयाच्वंगु धाःगु दु ।

लिसें नेपालभाषा ब्वंकीपिं शिक्षकतयत अभिमुखीकरण व तालीम ज्याझ्वः यायेगु नं महानगरपालिकां धाःगु दु ।

व हे पत्रमार्फत यलमपां अभिमुखीकरण व तालीम ज्याझ्वःया लागिं विद्यालयस नेपालभाषा विषय ब्वंकीपिं शिक्षकतय् विवरण नं माग याःगु दु ।