Apexcoder  tech

बज्राचार्य अवार्डय् यज्ञमान पतियात लाइफटाइम अचिभमेन्ट अवार्ड

eBukhan – बिराज,    २०८१ पौष १५, सोमबार    वर्गीकृत समाज

बज्राचार्य अवार्डय् यज्ञमान पतियात लाइफटाइम अचिभमेन्ट अवार्ड थुगुसीया वर्ल्ड बज्राचार्य अवार्डय् लाइफटाइम अचिभमेन्ट अवार्ड बौद्ध विद्वान यज्ञमान पति बज्राचार्ययात लःल्हाःगु दु ।

शनिबाः येँय् क्वचाःगु बज्राचार्य अवार्डया स्वक्वःगु संस्करणय् बौद्ध विद्वान बज्राचार्ययात लाइफटाइम अचिभमेन्ट अवार्डलिसें सम्मान याःगु खः । ज्याझ्वलय् बौद्ध विद्वान बज्राचार्ययात मूल चक्रेश्वर फनिन्द्र रत्न बज्राचार्यं ट्रफिलिसें हनापौ लःल्हानादिल ।

उगु हे ज्याझ्वलय् बौद्ध विद्वान धम्मावति गुरुमां व मिस्टर काठमाण्डु जेबिन्द्र रत्न बज्राचार्ययात विशेष सम्मान याःगु खः ।

थुगुसी हलिंन्यंकया हे थीथी विद्यालय, विश्वविद्यालयं एसईईनिसें पिएचडी वा व हे सरहया तगिमय् उत्तीर्ण जूपिं मुक्कं १४६ बज्राचार्य कुलपुत्र, कुलपुत्री, कुलवधुयात हनापौलिसें व उत्कृष्ट ६७म्हेसित अवार्डया ट्रफी नं लःल्हाःगु खः ।

ग्वसाः खलः बज्राचार्य क्लबया नायः सर्जु बज्राचार्यं बौद्ध धर्मया संरक्षण, प्रवर्ध्दनय् ल्यायम्ह पुस्ता आकर्षित यायेत क्लबं थीथी ज्याझ्वःत यानावयागु व थ्व हे झ्वलय् अवार्ड ज्याझ्वःया नं ग्वसाः ग्वयागु धयादिल ।

‘अज्ञानता वा उत्प्रेरणाया म्ह्वतिं जुइफु, ल्यायम्ह पुस्ता पुर्खां स्थापित याःगु मुल्यमान्यता, संस्कारं तापाना वनाच्वंगु दु । ल्यायम्ह पुस्तायात थःगु म्हसीका व कर्तब्यप्रति सचेत दयेकेत बज्राचार्य क्लबं म्हितावःगु भूमिकाया झ्वलय् छगू कुतः खः “वर्ल्ड वज्राचार्य अवार्डस्” नायः बज्राचार्यं धयादिल ।

ज्याझ्वः कजि सुजन बज्राचार्यं हलिमय् नांजाःगु बौद्ध धर्मया प्रचार प्रसार व अध्ययन अध्यापनया नेतृत्व नेपालीं हे यायेमाःगुलिइ बः बियादिल ।

‘थौंकन्हय् थरया रुपं कयातःगु बज्राचार्य न्हापा बौद्ध धर्मया दुग्यंगु अध्ययन व साधनां चूलाइगु छगू पदवी खः । आः झीसं बौद्ध धर्मय् आस्थावान सकसित धात्थेंया ‘बज्राचार्य’ दयेकेमाः व बौद्ध धर्म प्रचारप्रसार, अध्ययन अध्यापनया नेतृत्त्व झी नेपाःमिं यायेमाः’ कजि सुजनया धापू खः ।

ज्याझ्वलय् बागमति प्रदेश सांसद लिसें पुर्व मन्त्री शैलेन्द्र बज्राचार्य, बागमति प्रदेश सांसद लिसें वित्त समिति सभापति नुरज बज्राचार्य, नेवाः देय् दबूया नायः पवित्र बज्राचार्य, लुम्बिनी बौद्ध विश्वविद्यालयया उप कुलपति प्रा.डा. सुवर्णलाल बज्राचार्यलिसेंया उपस्थिती दुगु खः ।

शैक्षिक क्षेत्रय् सफलता हासिल याःपिं विद्यार्थीलिसें बौद्ध धर्मया प्रवर्ध्दन योगदान ब्यूपिन्त सम्मानया लागिं धासें सन् २०१९ निसें बज्राचार्य क्लबं वर्ल्ड बज्राचार्य अवार्डया सुरुवात याःगु खः ।