नेपाःया दकले न्हापांगु संकिपा ‘आमा’य् आमा जुयाः म्हितादीम्ह चैत्यदेवी सिंह लालीगुराँस सम्मानं सम्मानित जूगु दु ।

चैत्यदेवीलिसें वरिष्ठ सिने पत्रकार विजयरत्न असंबरे लगायत स्वंगू दर्जन कलाकःमि, कासामि व उद्यमि, समाजसेवीतयत लालीगुराँस सम्मान २०८१ पाखें सम्मानित याःगु खः ।

लालीगुरास क्रिएसन मिडिया नेपाल, तेजस्वी कला केन्द्र एण्ड मिडिया व ओजस्वी मल्टि मिडियाया मंकाः ग्वसालय् जूगु छगू ज्याझ्वलय् वयकःपिन्त सम्मान याःगु खः ।

ज्याझ्वलय् सञ्चार तथा सुचना प्रविधि मन्त्री पृथ्बी सुब्बा गुरुङं सम्मानित सकलसित सम्मान लःल्हानादिल ।

किर्तीमानी धावक एथ्लेट्स बैकुण्ठ मानन्धर, चलचित्र क्षेत्रया अग्रज नायक विश्व बस्नेत, लोकगीत सम्राट कुमार बस्नेत, नेपाःया न्हांपाम्ह ड्रमर देव राणालिसेंयात विशिष्ट सम्मान लःल्हागु खः ।

अथेहे, पुलांम्ह अभिनेता व निर्देशक कमल कान्त मैनाली, वरिष्ठ संगीतकार लक्ष्मण शेष, गायक रोज मोक्तान, गायक लिसें अभिनेता यस कुमार, वरिष्ठ मेकअप आर्टिष्ट सन्तु तामाङयात नं विशेष सम्मान देछाःगु खः ।

व हे कथं थीथी ख्यलय् विशिष्ट योगदान ब्यूपिं थीथी व्यक्तित्वयात नं सम्मान याःगु खः ।

ज्याझ्वलय् न्ववासें सञ्चार तथा सुचना प्रविधि मन्त्री गुरुङं थुगु स्वंगू संस्थां याःगु ज्या राष्ट्रं हे यायेमाःगु बिचाः तयादिल ।

लालीगुराँस क्रिएसन मिडिया नेपालया नायः ईन्द्र बिसुन्के बिन्दासं योगदानया कदर व हःपाःया नितिं सम्मान देछानागु धयादिल ।

तेजस्वी कला केन्द्र एण्ड मिडियाया नायःलिसें ज्याझ्वः निर्देशक सुमन कुमार श्रेष्ठं सम्मान सकलसित भिन्तुना देछासें वयकःपिनिगु योगदानयात च्वछानादिल ।