नेवाः संगीत ख्यलय् नांजाःम्ह संगीतकार, संगीतकःमि नील शाक्यया संगीतय् कुमार शानुया हिन्दी म्ये ‘शिद्दत’ सार्वजनिक जूगु दु ।

‘सांसोकि जरुरत है जैसे’, ‘तु मेरी जिन्दगी है’, ‘सोचेंगे तुम्हे प्यार करके नहिं’ लिसें तःपु हे ल्वकंह्वाःगु म्ये हालादीम्ह बलिउड म्येहालामि कुमार शानु व नेपालया रानी शाक्यया ज्वःम्ये ‘शिद्दत’ म्येहालामि रानी शाक्यया हे युट्युब च्यानलय् सार्वजनिक जूगु खः ।

वंगु जुन ३०य् सार्वजनिक जूगु थुगु म्येया थौं (जुलाई ४) न्हिनसिया १२ः०६ ताः ईतकया दुने ६ लाख ७३ हजार ३५८ भ्यूज दयेधुंकूगु दु ।

म्येया म्यूजिक भिडियोया निर्देेशन लिसें कोरियोग्राफी रामजी लामिछानें यानादीगु दु । छायाङ्कन मानकृष्ण महर्जनं यानादीगु दुसा दृश्य सम्पादन बन्दे प्रसादं यानादीगु दु ।

म्युजिक भिडियोलय् अभिषेक खड्का व कुसुम शर्मां अभिनय यानादीगु दु ।

म्येग्वः निशिला शाक्यं च्वयादीगु दु ।

थुगु म्येयात कयाः थः तसकं उत्साहित दुगु म्येहालामि कुमार शानुं धयादीगु दु । मुम्बईं छ्वयाहयादीगु हसनाय् गायक कुमार सानुं थुगु म्येया गीतकार, सगीतकारलिसें गायिकाया प्रशंसा यासें बांलाःगु म्येयात कयाः लसता प्वंकादीगु दु ।

म्येया संगीतकार नील शाक्यं नं कुमार सानु थुज्वःम्ह म्येहालामिलिसे ज्या यायेखनाः थः तसकं लयताःगु धयादीगु दु ।

संगीतकार नील शाक्य नेपालभाषाया न्हापांगु म्यूजिक भिडियो ‘लुमंका च्वना छन्त जिं’या गायक नं खःसा म्येहालामि सपनाश्रीं हालादीगु तसकं ल्वकंह्वाःगु म्ये ‘स्वयेगु मन जुल रे’ या च्वमि नं खः ।