किपूया नगर प्रमुखय् कांग्रेसया कृष्णमान त्यात
eBukhan – बिराजकाजी राजाेपाध्याय, २०८१ मङ्सिर १७, सोमबार वर्गीकृत समाज
किपू नगरपालिकाया नगर प्रमुख पदय् नेपाली कांग्रेसया कृष्णमान डंगोल त्याःगु दु ।
आइतबाः क्वचाःगु उप निर्वाचनय् डंगोल ५ हजार ३३४ मतलिसें त्याःगु खः ।
वयकःया सतीम्ह प्रतिद्वन्दी नेकपा (माओवादी केन्द्र)या उम्मेदवार शिवशरण महर्जनं ४ हजार ५५५ मत हयेत ताःलात । स्वंगूगु थासय् लाःम्ह नेकपा (एमाले) या सुरेन्द्र मानन्धरयात ४ हजार ३३७ मत प्राप्त जुल ।
स्वतन्त्र उम्मेदवार राजमान महर्जन २ हजार ३६ मत हयेत ताःलात ।
२०७९ सालया स्थानीय तहया निर्वाचनय् किपू नगरपालिकाय् नेपाली कांग्रेसया राजकुमार नकर्मी त्याःगु खः । वंगु २०८१ साउन १० गते जँलास्येँया ल्वयया हुनिं नकर्मी मदयेधुंकाः थन उप निर्वाचन जूगु खः ।
