येँ महानगरपालिका (येँ मपा) या ज्याकू सुथय् ९ताः इलंनिसें न्ह्याइगु जूगु दु । सेवा सहजताया लागिं धासें शुक्रबाःनिसें येँ मपां सुथय् १ घण्टा न्ह्यःनिसें ज्याकू न्ह्याकेगु याःगु खः ।

थ्व सेवा महानगरपालिकाया दक्वं विभाग, वडा, सचिवालय, आयोजना तकंया ज्याकूया हकय् लागू जुइगु येँ मपाया प्रवक्ता लिसें येँ मपा १७ वडाया वडाध्यक्ष नविन मानन्धरं धयादिल ।

सुथय् १०ताः इलंनिसें सरकारी व निजी क्षेत्रया ज्याकुथिइ ज्या याइपिं कर्मचारीयात थ्व व्यवस्थां महानगरपालिकां सेवा कायेत अःपुइगु दावी महानगरपालिकाया दु ।

सुथय् थःगु ज्याकू वने न्ह्यः महानगरपालिका व अन्तर्गतया थीथी ज्याकुथिं सेवा प्राप्त यायेत अःपुइमा धइगु उद्देश्यं थ्व व्यवस्था कार्यान्वयन जूगु प्रवक्ता मानन्धरया धापू दु ।

थप इलय् ज्या यायेत ‘येँ महानगरपालिका कर्मचारी सेवा सुविधा सम्बन्धी मापदण्ड २०८०’ नगर कार्यपालिकां स्वीकृत यानाः स्थानीय राजपत्रय् पिथनेधुंकूगु दु ।

सेवाया गुणस्तरीयता व प्रभावकारिताया लागिं अतिरिक्त इलय् तकं कार्य सम्पादन यायेत आवश्यक जूगुलिं पदीय जिम्मेवारी वहन याकेत उपलब्ध याकीगु स्रोत, साधन सम्बन्धी व्यवस्था मापदण्डं याःगु दु ।