येँ महानगर उपप्रमुखया बेलायत भ्रमणय् येँ व नेपाःया चर्चा

eBukhan – बेलायत संवाददाता ,    २०८१ जेठ २४, बिहिबार    वर्गीकृत राष्ट्रिय

येँ महानगरपालिकाया उपप्रमुख सुनिता डंगोलं थीथी स्थानीय संघसंस्था व समुदायलिसे अन्तरक्रिया यासें व थीथी ज्याझ्वलय् ब्वति कासें बेलायत भ्रमण क्वचायेकादीगु दु ।

येँ महानगरया उपप्रमुख डंगोलं छवाःया बेलायत भ्रमणया झ्वलय् अन जूगु बिस्कं बिस्कं प्यंगू ज्याझ्वलय् नं ब्वति कयादीगु खःसा थीथी अन्तरक्रिया ज्याझ्वःयात सम्वोधन नं यानादीगु खः ।

व झ्वलय् डंगोलं वंगु मे २४ निसें २६ तक स्वन्हुयंक जूगु ‘वुमन अफ् द वर्ल्ड’ (वाउ) अन्तराष्ट्रीय सम्मेलनय् नं ब्वति कयादिल ।

ईंग्ल्याण्डया उत्तरपश्चिमस्थित म्यान्चेष्टर शहरय् जूगु सम्मेलनय् हलिंन्यंकया थीथी ख्यलं प्रभावकारी मिसा व्यक्तित्वतयत ब्वनेगु झ्वलय् राजनीतिपाखें उपप्रमुख डंगोलयात नं ब्वंगु खः ।

सम्मेलनया झ्वलय् उपप्रमुख डंगोलं थीथी कार्यशालाय् नेपाःया प्रतिनिधित्व यासें मिसा सशक्तिकरणय् बः बियाः थःगु अनुभव इनादिल ।

उगु हे सम्मेलनय् डंगोलं वइगु सेप्टेम्बरय् येँ महानगरपालिकां ‘वुमन अफ् द वर्ल्ड (वाउ)’ सम्मलेनया ग्वसाः ग्वयेगु घोषणा नं यानादिल ।

व हे कथं २८ मे कुन्हु उपप्रमुख डंगोलं लण्डनया साउथ केन्जिंगटनस्थित नेपाःया राजदूतावासय् जूगु अन्तरक्रिया ज्याझ्वलय् ब्वति कयादिल ।

अन्तरक्रिया ज्याझ्वलय् उपमेयर डंगोलं येँ महानगरपालिकां न्ह्याकाच्वंगु थीथी आर्थिक, औद्योगिक, सांस्कृतिक व सामाजिक विकास परियोजनाया बारे जानकारी न्ह्यब्वयादिल ।

भ्रमणया झ्वलय् उपमेयर डंगोलं म्यान्चेष्टर, एडिनबरा, अक्सफर्ड, केण्ट व लण्डनया थीथी लागाय् च्वनाच्वंपिं नेपाःमि समुदायलिसें नं थीथी औपचारिक ज्याझ्वःत दुने अन्तरक्रिया नं यानादीगु खः ।

अथे हे, उपप्रमुख डंगोल ३० मे कुन्हु अक्सफर्ड विश्वविद्यालयय् ‘दि जेन्ट्रिफिकेशन अफ् काठमाण्डु’ विषयक छगू गोष्ठीइ नं ब्वति कयादिल ।

गोष्ठीइ मू कार्यपत्र प्रस्तुत यासें उपमेयर डंगोलं ऐतिहासिक नगर येँया शहरीकरणय् वयाच्वंगु हाथ्याया बारे चर्चा यानादिल ।

लिसें येँया सांस्कृतिक व सामाजिक सम्पदायात म्वाकातयेगु आज्जुं येँ महानगरपालिकाया नेतृत्वय् जुयाच्वंगु थीथी परियोजनायाबारे नं वयकलं जानकारी बियादिल ।

अक्सफर्ड विश्वविद्यालयय् संलग्न थीथी प्राज्ञतय् ब्वति दुगु गोष्ठीइ प्राध्यापक डेविड गेल्नर व प्राध्यापक दिवाकर आचार्यलिसें नं उपमेयर डंगोललिसे प्राज्ञिक अन्तरक्रिया यानादीगु खः ।

उकिया नापं ३१ मे कुन्हु ‘इण्डिजिनाइजिंग दि हिमालयज्’ नामं जूगु छगू ज्याझ्वलय् नं वयकलं ब्वति कयादिल ।

संयुक्त अधिराज्यया निगू शताब्दी पुलांगु संस्था ‘रोयल जियोग्राफिकल सोसाइटी’, मानविकी व समाजशास्त्रया राष्ट्रीय प्रतिष्ठान ‘बृटिश एकेडमि’ व ब्रुनेल विश्वविद्यालयया ब्वनाय् वयकः उगु ज्याझ्वलय् थ्यंगु खः ।

ज्याझ्वलय् वयकदं येँयाः (ईन्द्रजात्रा) या म्हसिका ब्युसें ऐतिहासिक, धार्मिक व सांस्कृतिक महत्वं जाःगु येँयाःयात येँ महानगरपालिकां राष्ट्रीय लिसें अन्तराष्ट्रीयकरण यायेत न्ह्याकाच्वंगु कुतःबारे प्रष्ट यानादिल ।

यँलाय् जुइगु येँयाःलय् ब्वति काःवयेत वयकलं सकसित इनाप नं यानादिल ।

उपप्रमुख डंगोलया बेलायत भ्रमणया झ्वलय् येँ महानगरया स्वम्ह मिसा कर्मचारीत श्रृष्टी तुलाधर, शिर्जु प्रधान तुलाधर व कमारी राई नं उखे झाःगु खः ।