कात्ति प्याखंया गुरु केशव कृष्ण श्रेष्ठ मन्त ।

कात्ति प्याखनय् लगातार ४८ दँतक बराह जुयाः प्याखं क्यंम्ह श्रेष्ठ म्हिगः (शनिबार) बहनी मदुगु खः । ८५ दँया श्रेष्ठ म्हिगः बहनी करीब ८ताः ईपाखे मदुगु खः ।

हर्नियाया समस्या जूम्ह वयकःयात वासः यायेत झिन्हु ति न्हयः वि एन्ड वि अस्पताल यंकूगु खः । बि एन्ड बि अस्पतालय् भर्ना यानाः वयकःया हर्नियाया शल्यक्रिया नं जुइधुंकूगु खः ।

लिपा वयकःया उसाँय् स्यनावंबलय् आइसीयूलय् तयाः वासः यानाच्वंगु खः । उसाँय् स्यनावनां अन्तिम अवस्था थ्यंबलय् वयकःयात म्हिगः शनिबाः पशुपति आर्यघाटय् यंकूगु खःसा अन हे वयकलं लिपांगु सासः ल्हानादीगु खः ।

वयकःया अन्त्येष्टि म्हिगः हे पशुपति आर्यघाटय् क्वचायेधुंकल । मदुम्ह श्रेष्ठयात वयकःया तःधिकःम्ह काय् अनिल कृष्ण श्रेष्ठं मि तःगु खः ।

मदुम्ह श्रेष्ठया परिवारय् निम्ह काय् व छम्ह म्ह्याय् दी ।

मदुम्ह श्रेष्ठया जन्म वि.सं. १९९६ साल भाद्र १ गते जन्म जूगु खः ।

वयकलं कात्ति प्याखनय् वि.सं. २०१४ सालनिसें २०६२ सालतक लगातार बराह जुयाः म्हितादिल ।

२०५८ सालनिसें वयकलं कात्ति प्याखंया मूलगुरुया रुपं नं योगदान बिया वयाच्वनादीगु खः ।

समाचारडेस्कया थ्व च्वसु नं ब्वनादिँसः ४८ वर्षसम्म लगातार बराह बनेका केशव कृष्ण श्रेष्ठ