अन्तर्राष्ट्रिय मातृभाषा पत्रकारिता सम्मेलनया दिं सतिनाच्वंबलय् सम्मेलनया तयारी तच्वःगु दुसा विदेशी पत्रकारत नं धमाधम येँय् थ्यनाच्वंगु दु ।

वइगु जेठ १९ व २० गते जुइत्यंगु निन्हुया सम्मलेनय् ब्वति कायेत थीथी देशं पत्रकारत येँय् थ्यनाच्वंगु दु । आःतकय् बङ्गलादेश, भारत, भुटानं पत्रकारत सम्मेलनय् ब्वति कायेत येँय् थ्यनेधुंकूगु दु ।

नेपालय् मातृभाषां पत्रकारिता न्ह्याःगु सछि दँ थ्यंगु लसताय् नेवाः पत्रकार राष्ट्रिय दबुलिं निन्हुयंकया अन्तर्राष्ट्रिय मातृभाषा पत्रकारिता सम्मेलन यायेत्यंगु खः ।

वइगु जेठ १९ गते शनिबाः व जेठ २० गते आइतबाः यानाः निन्हुया सम्मेलनया दबुलिं ग्वसाः ग्वयेत्यंगु खः ।

जेठ १९ गते शनिबाःया दिनय् यलया जावलाखेलस्थित नेपाल प्रशासनिक प्रशिक्षण प्रतिष्ठानय् सम्मेलनया उलेज्या समारोह जुइत्यंगु दु । पुर्व राष्ट्रपति विद्यादेवी भण्डारीं सम्मेलनया उलेज्या यानादीगु दबुलिं न्ह्यथंगु दु ।

‘नेपालय् मातृभाषा पत्रकारिता क्षेत्रय् विद्यमान समस्या, चुनौती, अवसरतकया पहिचान यायेगु व थुकिया सर्वाङ्गिण विकासय् न्ह्याःवनेत सम्मेलनया ग्वसाः ग्वयेत्यनागु खः’ पत्रकार राष्ट्रिय दबूया नायः नृपेन्द्रलाल श्रेष्ठं धयादिल ।

सम्मेलनया उलेज्या धुंकाः ‘विचार अले अभिव्यक्ति स्वतन्त्रता व मातृभाषा पत्रकारिता’ विषयस प्यानल सहलह जुइ ।

सम्मेलनया निन्हुगु दिनय् जेठ २० गते आइतबाः ख्वपया मध्यपुर थिमि नगरपालिकाया बोडेय् दक्षिण एसियाली देशय् मातृभाषा पत्रकारिताया प्रवृत्ति व मेगु दिशा’य् प्यानल सहलह जुइ ।

‘नेपालय् जक मखु, अन्तर्राष्ट्रिय क्षेत्रय् हे मातृभाषा पत्रकारिताया अभ्यासया बारे जानकारी कायेगु, विदेशी पत्रकारतलिसे विचार मन्थनं मातृभाषा पत्रकारिताया न्हूगु कार्यदिशा क्वःछीगु जिमिगु आज्जु दु’ ज्याझ्वः कजिलिसें पत्रकार दबूया केन्द्रीय न्वकू सुरेन्द्रभक्त श्रेष्ठया धापू दु ।

सार्क जर्नालिष्ट फोरमया नायः राजु लामां सार्क राष्ट्रया पत्रकारलिसें मेगु देयया मातृभाषा पत्रकारतयसं जुममार्फत ब्वति काइगु धयादिल ।

सार्क देय् भारत, बंगलादेश, भुटानलिसें पाकिस्तान, श्रीलंकालिसेंया देशं १५० मातृभाषी पत्रकारतय् सम्मेलनय् ब्वति दइगु दबूया दावी दु ।

जेठ २० गते आइतबाः मध्यपुर थिमिइ छगू समारोहया ग्वसाः ग्वयाः सम्मेलनया समापन यायेगु ज्याझ्वः दबूया दु । समापन समारोहस उप्रधान लिसें परराष्ट्रमन्त्री नारायणकाजी श्रेष्ठया उपस्थिती दइगु दबुलिं जानकारी ब्यूगु दु ।

सम्मेलनय् सार्क जर्नालिष्ट फोरम व आदिवासी जनजाति पत्रकार महासंघं (फोनिज) सहकार्य याःगु दु ।

थौं स्वयां सछि दँ न्ह्यः ने.सं. १०४४य् धर्मादित्य धर्माचार्यं नेपालभाषाया पत्रिका ‘बुद्धधर्म व नेपालभाषा’ पिथनादीगु खः । नेपालभाषाया थ्वहे पत्रिका नेपालया न्हापांगु मातृभाषी पत्रिका खः ।

‘बुद्धधर्म व नेपालभाषा’ पत्रिका लिसें न्ह्याःगु मातृभाषा पत्रकारिताया यात्रा सछि दँ थ्यंगु लसताय् दबुलिं सम्मेलनया ग्वसाः ग्वयेत्यंगु खः । थ्व हे झ्वलय् दबुलिं दछितक थीथी ज्याझ्वः यानावनेगु योजना दयेकूगु दु ।