नेपालभाषाया नांजाःगु संकिपा पानवतीया ५०क्वःगु च्यारिटी शो क्यनीगु जूगु दु ।

वइगु शनिबाः गुंलाथ्व द्वादशी (भाद्र १) कुन्हु जुइत्यंगु उगु शोलिसें संकिपाया छम्ह मुख्य कलाकार लिसें नेवाः संकिपा ख्यःया नांजाःम्ह हास्य कलाकार हृदयप्रसाद मिश्रयात सम्मान नं यायेत्यंगु दु ।

संकिपा क्यनेज्या न्ह्यः छगू ज्याझ्वः यासें कलाकार मिश्रयात सम्मान यायेत्यनागु संकिपाया निर्देशक सुरेन्द्र तुलाधरं जानकारी बियादिल ।

‘संकिपा क्यने न्ह्यः छगू बःचाधंक ज्याझ्वः यायेगु जुइ । उगु हे ज्याझ्वलय् कलाकार हृदयप्रसाद मिश्रजुया नेवाः संकिपा ख्यलय् निरन्तरया योगदानयात च्वछासें जिमिसं वयकःयात सम्मान यायेत्यनागु खः’ निर्देशक तुलाधरं धयादिल ।

पानवती संकिपाय् कलाकार मिश्रं मू पात्र पानवतीया अबुया भूमिका म्हितादीगु दु ।

कलाकार मिश्रं सुभाय्, न्याल्ल ब्यां, पपू मदुम्ह झंगः, नेकू, तिमिला, सत्य धरोधर्म लिसें आपालं नेवाः संकिपा, म्यूजिक भिडियो व ख्यालःत नं म्हितादीगुलिसें च्वया व निर्देशन नं यानादीगु दु ।

येँ सुन्धारा सिटिसि मलस्थित सिओसी सिनेमा हलय् पानवतीया ५०क्वःगु च्यारिटी शो जुइत्यंगु खः । हलिं नेवाः गुथि रविभवन कचां थुगु च्यारिटी शोया ग्वसाः ग्वःगु खः ।

नेवाः संकिपा ख्यलय् दकले यक्व च्यारिटी शो जूगु संकिपा कथं थुगु पानवती संकिपाया नां वयाच्वंगु दु ।

सुखावति फिल्म्स प्रोडक्सनया ब्यानरय् दयेकूगु थुगु संकिपा स्वनिगःलिसें नेपालं पिने अस्ट्रेलिया, जापान थुज्वःगु देशय् तकं क्यनेधुंकल ।

लिसें च्यारिटी शो यानाः मुंगु धेबां थीथी संघसंस्थालिसें आवश्यक जूपिन्त आर्थिक ग्वाहालि नं यानावयागु संकिपा युनिटं जानकारी ब्यूगु दु ।

वइगु शनिबाः न्हिनसिया १ः००ताः इलय् संकिपा क्यनेज्या न्ह्याइगु धाःगु दु ।