नुगः ल्वय् विशेषज्ञ डा. शाक्यया म्यूजिक भिडियो सार्वजनिक

eBukhan – बिराज,    २०८१ जेठ ५, शनिबार    वर्गीकृत मनोरञ्जन

नुगः ल्वय् विशेषज्ञ डाक्टर स्मृति शाक्यया म्हसीका आः डाक्टर जक मखुत । आः वयकःया म्हसीका नुगः ल्वय् विशेषज्ञ लिसें म्येहालामि नं जूगु दु ।

डा. शाक्यया सलय् ‘मैले माया लाएको धोका दिन होइन’ म्येया म्यूजिक भिडियो सार्वजनिक जूगु दु ।

डा. शाक्यया चीधिकःबलय् निसें हे म्ये हाले यःगु खः । डाक्टरी अध्ययन व प्राएक्टिसय् यक्व ई बीमाःबलय् चीधिकःबलय् निसेंया रहर पूवंके मफयाच्वंगु खः ।

आः धाःसा डा. शाक्यया सलय् स्वपु म्ये रेकर्ड जुइधुंकूगु दु । व मध्ये छपु ‘मैले माया लाएको’या म्यूजिक भिडियो वयकःया हे युट्युब च्यानलमार्फत शुक्रबाः सार्वजनिक जूगु खः ।

थुगु म्यूजिक भिडियोया निर्देशन लालटिन, लब सब, गोधुली, विषालुलिसेंया नेपाली संकिपाया निर्देशक देवकुमार श्रेष्ठं याःगु दु ।

उगु भिडियोलय् आकाश श्रेष्ठ व करुणा श्रेष्ठया लिसें म्येहालामि डा. शाक्यं नं अभिनय यानादीगु दु ।

‘म्ये हाले ला मचाबलयनिसेंया इच्छा खः, भिडियोलय् अभिनय नं याये खंबलय् तसकं लयतायागु दु’ डा. शाक्यं धयादिल ।

थुगु म्येया म्येग्वः च्वयेगु व लय् तयेगु ज्या बागमती प्रदेशया पूर्वमन्त्रीलिसें पूर्व सांसद डाक्टर अजयक्रान्ति शाक्यं यानादीगु दु ।

नुगः ल्वय् विशेषज्ञ डा. शाक्यं थ्वयां न्ह्यः संगीतज्ञ हरिशरण सायमिलिसे अरुणा लामा व रुद्रमणिया कालजयी म्ये ‘ए–कान्छा मलाई सुनको तारा खसाइ देउन’ कभर याःगु खः ।

अथेहे, बागमती प्रदेशया पुर्वमन्त्रीलिसें पूर्व सांसद डा. शाक्यया म्येग्वः व लसय् ‘केही मिठा कुरा गरौन’ म्ये नं रेकर्ड यायेधुंकूगु दु । थ्व म्ये नं आः छायाँकनया झ्वलय् दुगु डाक्टर शाक्यं धयादिल ।