काभ्रेया भ्वतय् मंकाः इहि ज्याझ्वः क्वचाःगु दु । परम्परायात निरन्तरताया नितिं धासें वाँख्यः त्वालं मंकाः इहि ज्याझ्वःया ग्वसाः ग्वःगु खः ।

भ्वतस्थित जापाली गुथि छेँय् जूगु इहि ज्याझ्वलय् समुदायया ३८ मिसा मचातय् ब्वति दुगु ग्वसाः खलःया विश्वराम मानन्धरं धयादिल ।

निन्हुया ज्याझ्वःया झ्वलय् वैशाख २७ गते कुन्हु दुस्वः पूजा व २८ गते अक्षय तृतीयाया दिनय् कन्यादान याःगु खः ।

इहि परम्परा कथं मिसा मचायात ब्याः अथवा बेल नांया छगः फलयात कन्यादान बी ।

हिन्दु परम्पराय् थुकियात सुवर्ण कुमार विवाह व बौद्ध मान्यताय् प्रज्ञा विवाह कथं कयातःगु दु ।

इहि याःम्ह मिसा मचा भविष्यय् वनाः छुं नं अवस्थाय् गबलें नं विधुवा च्वनेम्वाःगु मान्यता दु ।

इहि याइबलय् मिसा मचा न्हिछि अपसं च्वनाः पूजाविधि यायेमाः ।

पूजा ज्वःछिया थीथी ज्याखँया धार्मिक मान्यता ला दुगु हे जुल । लिसें थज्याःगु ज्याखं इहि याःम्ह मिसामचायात गृहस्थी जीवनय् यायेमाःगु थीथी ज्या व भूमिकाया ज्ञान तकं बीगु याः ।

भाःत मदयधुंकाः तिरि नं अनिवार्य सती वनेमाःगु कुप्रथा न्हंकेत सांस्कृतिक विद्रोहया रुपं इहि संस्कार न्ह्याकूगु ज्याझ्वःया छम्ह ज्याथःम्ह ब्वतिमिं धयादिल ।

अथेहे, तत्कालीन नेपालमण्डलय् मुसलिम जुजुं हताः याःबलय् इहिपाः मजूनिपिं मिसा मचातयत अपहरण यायेगु याःबलय् मिसा मचातय् सुरक्षाया नितिं ब्याःलिसे सांकेतिक रुपं इहिपाः यानाबियाः सिन्दूर तयेगु चलन न्ह्याःगु नं संस्कृतिविदतय् धापू दु ।