गणेशदेवी मेमोरियलं निम्ह नेवाः व्यक्तित्वयात हंगु दु ।

मेमोरियलं वरिष्ठ संगीतकर्मी रत्न बेहोशी व येँ महानगरपालिकाया निवर्तमान प्रमुख विद्यासुन्दर शाक्ययात गणेशदेवी लुमन्ति सिरपालिसें हंगु खः ।

वंगु शनिबाः येँय् छगू ज्याझ्वः वरिष्ठ संगीतकर्मी बेहोसी व येँ महानगरपालिकाया निवर्तमान प्रमुख शाक्ययात उगु सिरपाः लःल्हाःगु खः ।

नेपाःया संगीत ख्यलय् ज्वःमदुगु योगदान बियावःगु धासें वरिष्ठ संगीतकर्मी बेहोशीयात उगु सिरपाः लःल्हाःगु खः ।

अथेहे, थःगु कार्यकालय् येँ महानगरया स्कुलय् स्थानीय पाठ्यक्रमय् नेपालभाषा अनिवार्य ब्वंकेगुलिइ पलाः न्ह्याकूगु धासें निवर्तमान प्रमुख शाक्ययात उगु सिरपाःलिसें हंगु खः ।

नांजाःम्ह साहित्यकार मथुरा सायमिं बेहोशी व शाक्ययात दोसल्लां न्ययेकाः हनापौलिसें हनादिल ।

ज्याझ्वलय् सम्मानित व्यक्तित्वद्वय शाक्य व बेहोशी, फाउण्डेशनया नायः स्नेह सायमि, न्वकू देव आनन्द महर्जन, मथुरा सायमिलिसें नं थःथःगु नुगःखँ तयादीगु खः ।

म्येहालामि सज्जु मानन्धर व म्येच्वमि राजु मानन्धरया मां गणेशदेवी मानन्धरया लुमन्तिइ उगु सिरपाः नीस्वनातःगु खः ।