अन्ततः वंगु पुस २१ निसें रिक्त जुयाच्वंगु यल तलेजुया मूल पूजारी पद पूर्ति जूगु दु ।

यल पट्को त्वाःया भास्करानन्द शर्मा राजोपाध्याययात मूल पूजारीको रुपं तलेजु दुकाःगुलिसें रिक्त जुयाच्वंगु पद पूर्ति जूगु खः ।

असार २ आइतबाः तलेजुया बुसादँया दिनय् राजोपाध्याययात तलेजु देगलय् दुकाःगु खः ।

मूल पूजारी देगः दुहांवनेगु झ्वलय् तलेजु पूजारीतयसं स्वस्तिवाचन याःगु खः ।

तलेजु पूजारीत विष्णुचन्दन राजोपाध्याय, विनोद ज्वालानन्द राजोपाध्याय, निरण ज्वालानन्द राजोपाध्याय, ॐ ज्वालानन्द राजोपाध्याय, सुचित ज्वालानन्द राजोपाध्याय व रक्षण राजोपाध्यायं स्वस्तिवाचन याःगु खः ।

मूल पूजारी तलेजु दुहांवनेगु झ्वलय् मूल पुजारीं तलेजु भवानी व गनेद्यः, कृष्ण, बुंगद्यः, द्विमाजुलिसें १२ भाग ग्वयदां छाःगु खः ।

मेगु च्यागू भाग ग्वयदां थीथी तान्त्रिक द्यःपिन्त छाःगु खः, गुगु द्यःपिं सार्वजनिक मयाःसे गोप्य हे तयेगु याइ ।

थ्व प्रक्रिया गुठी संस्थान शाखा ज्याकू यलया प्रमुखया रोहबरय् यायेगु याइ । थुगुसी थ्व परम्परा पूवंकेगु झ्वलय् गुठी संस्थान यल शाखाया प्रमुख वैकुण्ठ आचार्य उपस्थित जूगु खः ।

लिसें थुगुसी तलेजु पूजारीतय् ब्वनाय् पाटन संग्रहालय अधिकृत सुरेश लाखेया नं उपस्थिती दुगु खः ।

व इलय् गुठी संस्थान यल शाखाया लेखापाल राजेन्द्र पोखरेल, दरवार हेरचाह तथा संरक्षण ज्याकू यलया मञ्जुसिंह भण्डारीलिसेंया नं उपस्थिती दुगु खः ।

वंगु २०८० पुस २१ गते कुन्हु यल तलेजु भवानीया तत्कालीन मूल पूजारी अनन्त ज्वालानन्द राजोपाध्याय मदयधुंकाः उगु पद रिक्त जुयाच्वंगु खः ।

यल तलेजुया ४०४क्वःगु बुसादँः

मूल पूजारीया मन्दिर प्रवेशलिसें व हे दिनय् यल तलेजु भवानीया बुसादँया पूजा नं क्वचाःगु दु ।

बुसादँया झ्वलय् कुशकुन्डिका यज्ञलिसें तलेजु देगलय् दुपिं दक्वं द्यःपिं प्रतिष्ठा याइ । लिसें मूलपुजारीं छाग बलिलिसें तलेजु भवानीया पूजा याइ ।

थुगुसी तलेजु भवनीया ४०४क्वःगु बुसादँ न्यायेकूगु खः । द्यःपिं स्थापना जूगु दिनय् बुसादँ न्यायेकेगु परम्परा दु ।

व हे परम्पराया लिधंसाय् यलय् तलेजु भवानी स्थापना जूगु ४०४दँ थ्यंगु प्रष्ट जू ।