ल्यायम्ह पुस्ता धर्म संस्कृति ख्यलं तापानावंगुलिइ च्यूताः

eBukhan – ईबुखँ डेस्क,    २०८१ जेठ २७, आइतबार    वर्गीकृत तजिलजि

सनातन धर्म संस्कृतिया संरक्षण यायेत थ्वलिसे सम्वन्धित इतिहास, दर्शन, नैतिक शिक्षा आदिया अध्ययन, अनुसन्धान यासें पुस्तान्तरण यायेमाःगुलिइ सरोकारवालातयसं बः ब्यूगु दु ।

स्वनिगःया आदिवासी ब्रह्मू समुदायया रुपं म्हस्यूपिं राजोपाध्यायतय् कुसा संगठन राजोपाध्याय समाजया ख्वप समितिं ग्वसाः ग्वःगु ज्याझ्वःया वक्तातयसं थथे बः ब्यूगु खः ।

राजोपाध्याय समाज जिल्ला समन्वय समिति ख्वपं शनिबाः ख्वपय् ‘सनातन धर्म संस्कृतिया संरक्षण, सम्वर्द्धन व प्रवर्द्धनय् राजोपाध्याय समाजया भूमिका’ विषयक अन्तरक्रिया ज्याझ्वःया ग्वसाः ग्वःगु खः ।

ज्याझ्वलय् न्ववासें समाजया नायः संजय शर्मा राजोपाध्यायं आःया अवस्थाय् राजोपाध्याय ब्राह्मणतय् अस्तित्व संकटय् लाःगु खः कि धइथें तायावःगु धयादिल ।

राजोपाध्यायतयसं थम्हं थःत म्हसीके मफयाः थज्याःगु अवस्था वःगु वयकःया धापू खः ।

‘वर्तमान इलय् राजोपाध्याय ब्रह्मूत कस्तुरी मृग थें जूगु दु । कस्तुरी थःके दु, पिने माः जुयाच्वंगु दु । थःके खुबी पिब्वयादिसँ व मेगु पुस्तायात नं बियादिसँ’ नृत्य कलाकार व निर्देशक तकं खःम्ह नायः राजोपाध्यायं धयादिल ।

पुलांगु पुस्तायाके दुगु ज्ञान न्हूगु पुस्ताय् पुस्तान्तरण याःसा सनातन धर्म व संस्कृतिया मौलिकता न्हूगु पुस्तां नं थुइगु व थुइकेफइगु राजोपाध्यायया बिचाः खः ।

चाँगुनारायणया मूल पूजारी चक्रधरानन्द राजोपाध्यायं सनातन धर्म संस्कृतिइ निरन्तर प्रहार जुयाच्वंगु धासें अथे प्रहार याइपिन्सं हे हरेक खँ व हरेक थासय् हिन्दुकरणया द्वपं बीगु यानाच्वंगु दावी यानादिल ।

पुस्तौं न्ह्यःनिसें थःगु हे पुर्खां व परिवारं मूलपूजारीया रुपं चाँगुनारायणया सेवा यानावयाच्वनागुलिइ आः वयाः हिन्दुकरणया द्वपं बियाः चाँगुनारायणयात थम्हं वा थः बाज्यापिन्सं तकं अन गबलें मखंगु द्यःया नां बियाच्वंगु वयकलं धयादिल ।

‘स्थापनकालनिसें हे जिमि पुर्खां व आः वयाः जिं चाँगुनारायणया नित्यलिसें पर्व पूजात यानावयागु दु । थौंकन्हय् चाँगुनारायणयात जिं व अथवा जिमि बाज्यापिन्सं तकं थन गबलें मखनानिगु द्यःया नां बियाः जिमित हे हिन्दुकरण याःगु द्वपं बियाच्वंगु दु । छु थ्व झीगु धर्मय् प्रहार मखुला ?’ चाँगुनारायणया मूल पूजारी चक्रधरानन्दं न्ह्यसः तयादिल ।

समाजया संस्थापक अध्यक्ष नायः ज्वालानन्द राजोपाध्याय, मू छ्यान्जे बिराजकाजी राजोपाध्यायं धर्म, संस्कृतिया संरक्षण, सम्वर्द्धन व प्रवर्द्धन यायेत संगठित जुयाः न्ह्याःवनेमाःगु बिचाः तयादिल ।

सकलें संगठित जुयाः थःके दुगु ज्ञान मेपिन्त बियाः, अन्तरक्रिया सहलह यासें न्ह्याःवनेमाःगुलिइ राजोपाध्यायद्वयया बः खः ।

समाजया ख्वप समिति कजि गिरीशराज शर्मा राजोपाध्यायं धर्म, संस्कृति क्षेत्रय् विद्यमान समस्याया समाधान मालेत सकसित संगठित यानाः निरन्तर अन्तरक्रिया, सम्वाद यानावनेगु प्रतिवद्धता प्वंकादिल ।

उपाकर्म गुठी ख्वपया न्वकू लवकुश राजोपाध्याय, स्थानीय गुरु, पुरोहितलिसें धर्म संस्कृतिया अध्येता, संस्कृतिविद्पिं हरिशरण राजोपाध्याय, मृगेन्द्रराज सुवेदी, सरोजन शर्मा, धनेशराज राजोपाध्यायं इतिहास, वेदलिसेंया धार्मिक ग्रन्थ, संस्कृत भाषाया नं अध्ययन यायेमाःवगुलिइ बः ब्युसें थःथःगु बिचाः तयादिल ।

संस्कृतया अध्ययन विना धर्म, संस्कृतिया अध्ययन सम्भव मजुइगु वयकःपिनिगु धापू खः ।

धर्म, संस्कृतिलिसे सम्वन्धित गतिविधियात समयसापेक्ष आधुनिक प्रविधिलिसे नं स्वानायंकेमाःगु छ्याता ज्याझ्वलय् ब्यूगु खः ।