राष्ट्रपति रामचन्द्र पौडेलं नेपाःया दक्वं जातजाति, भाषाभाषी व संस्कृतिया उत्थान व विकास जुइगु कथं सञ्चार माध्यमय् बुखँ सम्प्रेषण जुइमाःगुलिइ बः बियादीगु दु ।

नेवाः पत्रकार राष्ट्रिय दबूया पदाधिकारी व पत्रकारतलिसे राष्ट्रपति भवन शीतल निवासय् आइतबाः नापलासें राष्ट्रपति पौडेलं नेपाल बहुजातीय, बहुभाषिक व बहुसांस्कृतिक देय् जूगुलिं सञ्चार गृह व समाचार नं समावेशी जुइमाःगुलिइ बः बियादिल ।

‘नेपाःया विकासया लागिं थनया थीथी समुदाय, थीथी भाषा, संस्कृतिया विकास व अधिकारया उपभोगं हे राष्ट्रिय एकता बल्लाइ । संचारमाध्यमं नं थ्व खँय् ध्यान बियाः सामग्री सम्प्रेषण यायेमाः’ राष्ट्रपति पौडेलं धयादिल ।

राष्ट्रपति पौडेलं पत्रकारिताया समावेशीकरण, नेपालय् मातृभाषा पत्रकारिताया विकासया लागिं थःगु ग्वहालि व समर्थन दयाच्वनीगु धयादिल ।

व झ्वलय् पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठ, वरिष्ठ न्वकू सुनील महर्जनं सञ्चारमाध्यमया समावेशीकरण व मातृभाषाया पत्रकारिताया विकासया लागिं ठोस पहल यायेत राष्ट्रपतियात इनाप यानादीगु खः ।

व इलय् पत्रकार दबूपाखें नायः श्रेष्ठं राष्ट्रपतियात ध्यानाकर्षण पौ नं लःल्हानादीगु खः ।

संचार सम्वद्ध संघसंस्था समावेशी दयेकेत पहल यायेगु संचारमन्त्री गुरूङको प्रतिवद्धता

आइतबाः हे नेवाः पत्रकार राष्ट्रिय दबुलिं सञ्चार तथा सूचना प्रविधिमन्त्री पृथ्वीसुब्बा गुरुङयात नं ज्ञापनपौ लःल्हाःगु दु ।

दबुलिं सूचना तथा संचार प्रविधिमन्त्री गुरुङयात च्यागू बुँदे ज्ञापन पौ लःल्हासें सञ्चार सम्बद्ध संघसंस्थाया संरचना समावेशी चरित्रया दयेकेमाःगु माग याःगु खः ।

प्रेस काउन्सिल, सूचना विभाग, न्यूनतम पारिश्रमिक निर्धारण समितिलिसें सरकारी सञ्चार माध्यमया नेतृत्वय् समानुपातिक सहभागिताया लिधंसाय् समावेशी दयेकेत दबुलिं माग याःगु खः ।

दबूया ज्ञापनपौ लःल्हानाकासें मन्त्री गुरुङं नेपाली सञ्चार माध्यम र सञ्चार सम्बद्ध संघसंस्थायात समावेशी चरित्रया दयेकेत थम्हं पहल यायेगु प्रतिवद्धता प्वंकादिल ।

नेपाली सञ्चार माध्यम व सञ्चार सम्बद्ध संघसंस्था समावेशी चरित्रया मजूबलय् दक्वं समुदायया प्रतिनिधित्व जुइमफूगु स्वीकार यासें गुरुङं उकिया लागिं थम्हं पहल यायेगु विश्वास प्रतिवद्धता प्वंकादिल ।

सरकारं लोक कल्याणकारी विज्ञापन मातृभाषां नं बीत दबुलिं मन्त्री गुरुङया ध्यानाकर्षण याकूगु खः ।

अथेहे, सञ्चार मन्त्रालयपाखें पत्रकार सम्बद्ध संघसंस्थायात उपलब्ध याकीगु अनुदानय् जातीय पत्रकार संघयात नं कःघायेत दबुलिं माग याःगु दु ।

व झ्वलय् दबूया केन्द्रीय नायः नृपेन्द्रलाल श्रेष्ठं न्हापांम्ह मातृभाषा पत्रकार धर्मादित्य धर्माचार्यया नामं हुलाक टिकट पिथनेत नं माग यानादीगु खः ।

वि.सं. १९८२ सालय् धर्मादित्यं नेपालभाषां ‘बुद्ध धर्म’ पत्रिका पिथनाः मातृभाषा पत्रकारिताया सुरुवात यानादीगु खः ।

मन्त्री गुरुङयात नापलायेत नेपाल आदिबासी जनजाति पत्रकार महासंघ (फोनिज) या वरिष्ठ न्वकू लक्की चौधरी, न्वकू अमरध्वज लामा, दबुलिइ आवद्ध पदाधिकारी व दुजःत थ्यंगु खः ।

नेपालभाषा माध्यमं मातृभाषा पत्रकारिताया सुरुवात जूगु सछि दँ थ्यंगु लसताय् पत्रकार दबुलिं थीथी ज्याझ्वः व गतिविधि यानाः मातृभाषा पत्रकारिता शताब्दी महोत्सव हनाच्वंगु दु ।