दँयदसं अगस्ट ९ तारीखया दिनय् हनावःगु विश्व आदिबासी दिवस थुगुसी तःजिक हने थीथी जातीय संघसंस्थातलिसे सहलह क्वचाःगु दु ।

नेपाल आदिवासी जनजाति महासंघं (नेफिन) अगस्ट ९ या दिनय् विश्व आदिवासी दिवसया ३०क्वःगु संस्करण हनेगु सन्दर्भय् महासंघय् आबद्ध जातीय संघसंस्थातलिसे सहलह याःगु खः ।

नेफिनया मुँज्यां थुगुसीया दिवसया नितिं नारा क्वःछ्यूगु महासंघया बरिष्ठ न्वकू बुद्ध घर्तीं जानकारी बियादिल ।

मुँज्यां थुगुसीया दिवसया नितिं ‘संविधान प्रदत्त अधिकार आदिवासीतय् विशेष क्षेत्र, संरक्षित क्षेत्र व स्वायत्त क्षेत्र कार्यान्वयन या ! प्रदेश व स्थानीय तहया सरकारी ज्याखँया भाषाय् आदिवासी जनजातिया भाषा लागू या !!’ धइगु मूल नारा क्वःछ्यूगु खः ।

थुगुसीया दिवसया नितिं संयुक्त राष्ट्र संघं “Protecting the Rights of Indigenous Peoples in Voluntary Isolation and Initial Contact” मूल अन्तर्राष्ट्रिय नारा क्वःछ्यूगु दु ।

दँयदसं थें थुगुसी नं छवाःयंक थीथी ज्याझ्वः यानाः दिवस हनेगु तयारी जुयाच्वंगु जानकारी मुँज्याय् ब्यूगु खः ।

अगस्ट ९ या दिनय् मूल समारोहया ग्वसाः ग्वयाः तःजिक आदिवासी दिवस हनेगु तयारी जुयाच्वंगु नेफिनया मूछ्यान्जे दिवश राईं जानकारी बियादिल ।

नेपालया आदिवासी जनजाति मातृभाषा व लोकभाकाया म्येत, सांस्कृतिक झाँकी, स्थानीय व रैथाने प्रकृतिया आदिवासी जनजातीय कलाकृतिलिसेंया प्रदर्शनी, थीथी जातीय भेषभूषा, सांस्कृतिक झाँकीलिसेंया र्‍यालिया ग्वसाः ग्वयेगु महासंघं धाःगु दु ।

व झ्वलय् जनजातिया थीथी मौलिक नसात्वँसाया प्रदर्शनी अले बिक्रीया स्टल तकं तयेगु धाःगु दु ।

महासंघं आदिबासी दिवसयात छवाःयंक हनेत थःथःगु जातीय संस्थामार्फत क्वःछ्यूगु ज्याझ्वःया बारे महासंघयात जानकारी बीत नं इनाप याःगु दु ।

महासंघया नायः गेल्जे लामा शेर्पां मूल समारोहया दिनय् थःथःगु म्हसीका पिब्वइगु झाँकी लिसें फक्व यक्व ल्याखय् ब्वति दयेकेगु तयारी यायेत इनाप यानादिल ।

हलिंया आदिवासीतयसं दँयदसं ९ अगस्टकुन्हु अन्तर्राष्ट्रिय आदिवासी दिवस हनावःगु दु ।

संयुक्त राष्ट्र संघं अगस्ट ९ तारिखयात विश्व आदिवासी दिवसया रूपं हनेगु घोषणा यायेधुंकाः सन् १९९४ निसें दँयदसं थ्व दिवस हनेगु न्ह्याःगु खः ।