लुम्बिनी प्रदेशय् मातृभाषायात सरकारी ज्याखँया भाषा दयेकेगु सम्बन्धय् लुम्बिनी प्रदेशया राजधानी दाङया देउखुरीइ सहलह जूगु दु ।

संविधानय् व्यवस्था जूकथं भाषा आयोगया सिफारिसयात कार्यान्वयन यायेगु सम्बन्धय् ज्याझ्वलय् सहलह जूगु खः ।

आदिवासी जनजाति उत्थान राष्ट्रिय प्रतिष्ठानया न्वकू गोकुल घर्ती मगर, लुम्बिनी प्रदेशया मुख्यमन्त्री जोखबहादुर महरा व लुम्बिनी प्रदेशसभाया सभामुख तुलाराम घर्ती मगर बसन्तया न्ह्यःने थुगु विषयस सहलह याःगु खः ।

अन्तरक्रियात्मक विचार गोष्ठीइ भाषाशास्त्री अमृत योन्जन तामाङं ज्यापौ न्ह्यब्वयादीगु खः ।

व झ्वलय् लुम्बिनी प्रदेशय् मगर, थारु व अवधि भाषायात नं कामकाजी भाषाया रुपं याकनं हे कार्यान्वयनय् हयेत कानुन निर्माणया प्रक्रिया न्ह्यःने यंकेत बः ब्यूगु खः ।

थःगु नुगःखँ तयेगु झ्वलय् मुख्यमन्त्री महरां भाषा आयोगया सिफारिस कथं सरकारी ज्याखँया भाषा दयेकेगु सम्बन्धय् सकारात्मक पहलकदमीया भूमिका म्हितेगु प्रतिबद्धता प्वंकादीगु खः ।

ज्याझ्वलय् प्रदेश सरकारया मन्त्रीत, प्रदेशसभाया सांसदत, मगर व थारु संस्थाया केन्द्रीय व जिल्ला तहया पदाधिकारीतलिसेंया उपस्थिती दुगु खः ।

ज्याझ्वः आदिवासी जनजाति उत्थान राष्ट्रिय प्रतिष्ठानं ग्वसाः ग्वःगु खः ।