वरिष्ठ निर्देशक पवन जोशीया निर्देशनय् १४२पुगु म्यूजिक भिडियो सार्वजनिक जूगु दु ।

निरन्तर म्ये च्वयेगुलिसें म्यूजिक भिडियो निर्देशन यानावःम्ह वरिष्ठ निर्देशक जोशीया निर्देशनय् नेपालभाषाया म्ये ‘नुगः चफुनां’या म्यूजिक भिडियो सार्वजनिक जूगु खः ।

शनिबाः यलय् जूगु छगू ज्याझ्वःया दथुइ संसार्स संगीतालयया संरक्षकलिसें समाजसेवी, म्येहालामि सरीता महर्जनं उगु म्यूजिक भिडियो सार्वजनिक यानादिल ।

ज्याझ्वलय् न्ववासें संरक्षक महर्जनलिसें वरिष्ठ सिने पत्रकार विजयरत्न तुलाधर, संसार्स क्रिएशनया क्रिएटिभ डाइरेक्टर स्वतन्त्र महर्जनं नेपालभाषाया म्यूजिक भिडियो ख्यः चकना वनाच्वंगु धासें लसता प्वंकादिल ।

वरिष्ठ निर्देशक जोशीं नुगः चफुनां म्यूजिक भिडियो दुने सामाजिक घटनाक्रमयात चित्रण यायेत स्वयागु व सामाजिक हसना बीत स्वयागु धयादिल ।

सार्वजनिक जूगु थुगु म्येय् सःलिसे म्येग्वः न्हूम्ह म्येहालामि नानीशोभा महर्जनयागु खःसा राजेन्द्र शाक्यं लसय् हनादीगु दु ।

म्यूजिक भिडियोलय् म्येहालामि महर्जनलिसें राजेश महर्जन, जयलक्ष्मी सिद्धी बज्राचार्य, मीरा डंगोल, प्रेम कार्की व संगीत गुरु रत्न वेहोसी बज्राचार्यलिसें दर्जनौ कलाकारं अभिनय यानादीगु दु ।

राजेश शाक्यं छायांकन व दृश्य सम्पादन यानादीगु दु ।

म्यूजिक भिडियो संसार्स अनलाइन टिभी युट्युव च्यानलमार्फत सार्वजनिक जुइधुंकूगु दु ।