येँ महानगरपालिका १८ वडाया ग्वसालय् जूगु धिमे स्यनेज्या क्वचाःगु दु ।

स्वलायंक जूगु धिमे स्यनेज्याया छगू समापन ज्याझ्वः यासें स्यनेज्याया ब्वतिमि प्रशिक्षार्थीतयत दसिपौ इंगु दु ।

१८ वडास्थित पुष्पलाल स्मृति पार्कय् जूगु ज्याझ्वलय् प्रशिक्षार्थीतयत येँमपा १८ वडाया वडाध्यक्ष न्हुछेकाजी महर्जनं दसिपौ लःल्हानादिल ।

थ्व स्वयां न्ह्यः ताहाननिया नासःद्यःयाथाय् पूजा यासें सकल प्रशिक्षार्थीतयत बाजं लःल्हायेगु ज्या जूगु खः ।

ज्याझ्वलय् प्रशिक्षार्थीतयपाखें साँस्कृतिक ज्याझ्वः  नं न्ह्यब्वःगु खः ।

धिमे स्यनेज्याय् गुरु अनिल महर्जनं प्रशिक्षण बियादीगु खःसा सुजाता महर्जनं प्रशिक्षणय् ग्वहालि यानादीगु खः ।

ज्याझ्वलय् वडाध्यक्ष न्हुछेँकाजी महर्जन, वडा दुजः हेमज्योती शाक्यलिसें नं वडापाखें स्थानीय मूर्त अमूर्त सम्पदाया संरक्षण, सम्वर्द्धन व प्रवर्द्धनया नितिं ज्या यानावयागु व यानां तुं च्वनेगु प्रतिवद्धता प्वंकादीगु खः ।

धिमे स्यनेज्याय् ७दँ दुम्ह मचांनिसें ४८दँ दुपिं गृहिणीत नं यानाः मुक्कं ३५म्ह प्रशिक्षार्थीतय् ब्वति दुगु खः ।