रन्जना, प्रचलित, भुजिंम्वः, देवनागरीलिसेंया लिपितलिसे सम्वन्धित जुयाः क्यालिग्राफी महोत्सवया ग्वसाः ग्वइगु जूगु दु ।

नेपाःया थीथी लिपितलिसे सम्वन्धित जुयाः ज्याझ्वःत यासें येँय् नेपाल अक्षर, नेपाल क्यालिग्राफी महोत्सव २०२४ या ग्वसाः ग्वयेत्यंगु खः ।

क्यालिग्राफी नेपाल व क्यालिजात्राया मंकाः ग्वसालय् वइगु भदौ १५ गतेकुन्हु येँया बबरमहलस्थित नेपाल आर्ट काउन्सिलय् थुगु महोत्सव जुइत्यंगु खः ।

महोत्सवय् थीथी लिपि सम्वन्धि कार्यशाला, प्रत्यक्ष क्यालिग्राफी सत्र, लिपि प्रदर्शनी, प्यानल डिस्कसनलिसेंया ज्याझ्वःत जुइगु ग्वसाः खलकं धाःगु दु ।

ग्वसाः खलःया कथं महोत्सवय् रन्जना, प्रचलित, भुजिंम्वः, देवनागरीलिसेंया लिपियाबारे अन्तरक्रिया जुइ ।

लिसें थीथी कलाकारतय् चित्रकलाया माध्यमं लिपिया विविधिता व माध्यमया ब्वज्या नं जुइगु धाःगु दु ।

थुगु ब्वज्यां थीथी नेपाली लिपिया सौन्दर्यय् जः ह्वलीगु ग्वसाः खलःया दावी दु ।

‘क्यालिग्राफी, ल्हातं च्वयेगु ज्या जक मखु, थ्व थःके हे छगू कला व कलाकारिता खः । ब्वज्याय् कलाकारतयसं थःम्हेसिनं ल्यःगु माध्यमं थःगु कलायात अभिव्यक्त याइ’ क्यालिग्राफी नेपालया संस्थापक रतन कर्णं धयादिल ।

क्यालिग्राफी सत्रय् महोत्सव चाःह्यूवइपिन्सं रन्जना लिपिं थःगु नां च्वकेगुलिसें क्यालिग्राफीया सीप व तरीकाबारे थुइकेत थम्हं हे नं कुतः यायेफइगु क्यालिजात्राया न्वकू लुमु श्रेष्ठं धयादिल ।

थःपिन्सं स्वनिगःलिसें नेपाःया थीथी ८० स्वयां अप्वः थासय् सछि स्वयां अप्वः क्यालिग्राफी सत्र न्ह्याकेधुनागु न्वकू श्रेष्ठं जानकारी बियादिल ।

‘जिमिगु आज्जु धयागु हे रन्जना लिपिया प्रवर्द्धन खः । क्यालिजात्रा ज्याझ्वलं समुदाय दुने रन्जना लिपि सम्वन्धि बृहत रुपं सचेतनाको विकास जुयावंगु जिमिसं खनागु दु’ न्वकू श्रेष्ठया दावी खः ।

नेपालय् यक्व हे बांबांलाःगु व अद्वितीय लिपित दुगु व उकीसनं रञ्जना लिपि विशेष रुपं बांलाःगु क्यालिजात्राया संस्थापक व डिजाइनर आनन्द के. महर्जनं धयादिल ।

D&DA Yellow Pencil Award व TDC Exellence Award थुज्वःगु प्रतिष्ठित अन्तर्राष्ट्रिय डिजाइन पुरस्कार त्याकूगु ‘नित्या रञ्जना’ फन्ट विकास यायेखनां थःपिन्त गर्व ताःगु महर्जनया धापू खः ।

थ्व महोत्सव रन्जना, प्रचलित, भुजिंम्वः, देवनागरीलिसें नेपाःया थीथी लिपिया बारे जानकारी कायेगु, अन्तरक्रिया यायेगु, न्हूगु ज्ञान व विचार मालेगु छगू बांलाःगु दबू जुइगु ग्वसाःखलकं दावी याःगु दु ।

नेपाःया लेखन कलाया परम्पराया प्रवर्द्धन यासें ल्वकं ह्वाकेगु व परम्परागत लेखन कलायात न्हूगु पुस्तालिसे स्वायेगु महोत्सवया आज्जु खःगु क्यालिग्राफी कलाकार सौरभ थापा श्रेष्ठं धयादिल ।

क्यालिग्राफी व थ्वलिसे सम्वन्धित कलाया नमूना न्यायेगु नितिं नं थ्व महोत्सव बांलाःगु बजाः जुइगु ग्वसाः खलकं धाःगु दु ।

भदौ १५ या दिनस थुगु महोत्सव सुथसिया ११ताः इलंनिसें सनिलया ६ताः ईतक जुइगु ग्वसाः खलकं जानकारी ब्यूगु दु ।