नेपाली क्यालिग्राफी महोत्सवया निगूगु संस्करणया रुपं ग्वसाः ग्वःगु ‘नेपाल अक्षर’ ज्याझ्वलय् न्हूगु ‘क्यालिग्राफी एप’ या शुभारम्भ जूगु दु ।

नेपाली क्यालिग्राफीया विकास व प्रवर्द्धनया लागि धासें ‘क्यालिग्राफी नेपाल’ व ‘क्यालिजात्रा’या मंकाः ग्वसालय् येँय् जूगु महोत्सवय् क्यालिग्राफी एपया शुभारम्भ याःगु खः ।

नेपाली लिपि व लेखन कलायात डिजिटल माध्यमं सयेकेत व अभ्यास याइपिनिगु नितिं थ्व एपं यक्वं ग्वहालि जुइगु ग्वसाः खलकं धाःगु दु ।

महोत्सवय् भारतं वःपिं स्वम्ह कलाकारतय् विशेष ब्वतिलिसें ४० स्वयां अप्वः कलाकारतयसं थःगु श्रृजनाया ब्वज्या याःगु खः ।

निक्वःया अन्तर्राष्ट्रिय क्यालिग्राफी धेंधें बल्लाःया त्याकामि अनिल थामनया कला ब्वज्या व कार्यशाला महोत्सवया विशेष आकर्षणया रूपय् दुगु खः ।

महोत्सवय् येँ महानगरया उपप्रमुख सुनिता डंगोलं प्रत्यक्ष क्यालिग्राफी ब्वज्या यानादीगु खः । उपप्रमुख डंगोलं थःगु प्रस्तुतीमार्फत नेपाली लिपि व कलाया महत्त्वय् जः ह्वलादीगु खः ।

महोत्सवय् ल्यायम्ह क्यालिग्राफरतयसं ‘अब्स्ट्राक्ट क्यालिग्राफी’ व ‘क्यालिग्राफिटी’  छ्यलाः नेपाली लिपि व कलाया न्हूगु शैलीइ न्ह्यब्वःगु खः ।

महोत्सवं नेपाली क्यालिग्राफी ख्यःयात अन्तर्राष्ट्रिय स्तरय् थ्यंकेगु कुतःयात अझ सशक्त दयेकूगु दावी ग्वसाः खलकं याःगु दु ।

महोत्सवं नेपालया ल्यायम्ह कलाकारतयत नेपाली लिपि व लेखन कला ख्यलय् न्हूगु सम्भावना मालेत प्रेरित याःगु दावी नं ग्वसाः खलकं याःगु दु ।