जबरजस्ती करणी मुद्दाय् फरार छम्ह नेपाली अभियुक्तयात कुवेतय् ज्वनाः नेपाल छ्वयाहःगु दु ।

इन्टरपोलं रेड नोटिस जारी यानाः फरार जुयाच्वंम्ह काभ्रेपलान्चोक चौरीदेउराली गाँउपालिका–८ या ३१ दँयाम्ह उमेश लामायात कुवेतय् ज्वनाः मंगलबाः नेपालय् छ्वयाहःगु खः ।

एनसिबि कुवेतया समन्वयय् कुवेतय् ज्वनाः लामायातयात सम्बन्धित मुद्दाय् कारवाही यायेत मंगलबाः नेपाल लितहःगु खः ।

लामाविरुद्ध प्रहरी वृत्त जगाती ख्वपय् जबरजस्ती करणी मुद्दाय् मुद्दा दर्ता जूगु खःसा अनुसन्धानया झ्वलय् लामा वैदेशिक रोजगारीया सिलसिलाय् कुवेतय् च्वनाच्वंगु सीदुगु खः ।

अन्तर्राष्ट्रिय स्तरय् खोजतलास व पक्राउ यायेत नेशनल सेन्ट्रल व्यूरो (एनसिबी) येँया इनापय् इन्टरपोल महासचिवालयं २०८० असोज ११ गते वया विरुद्ध रेड नोटिस जारी याःगु खः ।

थ्व सम्बन्धय् प्रहरीं माःगु अनुसन्धान यानाच्वनागु धाःगु दु ।